İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 287 Hüküm no: 360 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parnak v. Parnoş v. Mori ölmeden önce kendisine ait değirmen vesairenin on iki sehimden altı sehimini Abraham v. Kanber sattığı Fi’l-asl vilâyet-i Anadolu’da Eğin kazâsına tâbi‘ Eğin-i Karuşlu nâm karyeden olup mahrûse-i İstanbul’da Balat kurbünde Ekmekçi iken bundan akdem hâlik olan Parnak v. Baro’nun hayâtında şerîki olan işbu bâ‘isü’l-vesîka Hokaz v. Mircan nâm Ermeni meclis-i şer‘-i şerîfde hâlik-i mezbûrun evlâd-ı sıgārı Serapiyon ve Argode ve Derode’nin tesviye-i umûrları için kıbel-i şer‘den mansûb vasîleri olmağla zikri âtî eşyâya vâzı‘ü’l-yed olan Abraham v. Kanber muvâcehesinde üzerine da‘vâ ve takrîr-i kelâm edip mezbûr Parnak hayâtında târih-i kitâbdan sekiz ay mukaddem mahall-i mezbûrede vâki‘ lede’l-ahâlî ve’l-cîrân ma‘lûmü’l-hudûd değirmende mevcûd dokuz re’s bârgîr ve değirmene mahsûs olup beynimizde ilm-i şer‘î ile ma‘lûm âlet-i lâzım-ı memlûkesini on iki sehimden altı sehm-i şâyi‘ini otuz iki bin akçeye bana bey‘ ve temlîk ve teslîm ben dahi ber-vech-i muharrer iştirâ ve kabûl ve ona münâsib kabz ile ve tesellüm ve semen-i mezbûru yedimden bi’t-tamâm ve’l-kemâl ahz u kabz edip o târihden beri mârrü’z-zikr bârgîrleri ve âlâtın on iki sehimden altı sehm-i şâyi‘ini otuz iki bin akçeye bana bey‘ ve temlîk ve teslîm ben dahi ber-vech-i muharrer iştirâ ve kabûl ve ona münâsib kabz ile ve teslîm ve semen-i mezbûru yedimden bi’t-tamâm ve’l-kemâl ahz u kabz edip ol târihden beri mârrü’z-zikr bârgîrler ve âlâtın on iki sehimden altı sehm-i şâyi‘ini otuz iki bin akçeye bana bey‘ ve temlîk ve teslîm ben dahi vech-i muharrer [üzere] iştirâ ve kabûl ve ona münâsib kabz ile kabz ve tesellüm ve semen-i mezbûr mecmû‘unu bi-gayrı hakkın kabz edip ol târihden beri mârrü’z-zikr bârgîrleri ve âlâtın on iki sehimden altı sehmi mülk ve hakkım iken mezbûr Parnak hâlik oldukda kādı-yı mezbûr Mehmed Çelebi bi-gayrı hakkın kabz eder suâl olunup hissemden kasr-ı yedine tenbîh olunmak matlûbumdur dedikde gıbbe’s-suâl mezbûr Abraham cevâbında fi’l-hakīka mârrü’z-zikr değirmen eşyâsına vâzı‘ü’l-yed olduğunu ikrâr lâkin müdde‘î-yi mezbûrun ol mikdâr iştirâsını inkâr edicek müdde‘î-yi mezbûrdan müdde‘âsına beyyine taleb olundukda tâife-i mezbûreden Yavacı fırın ustası Mıgırdıç v. Haçuk ve Hazret-i Eyyüb Ensârî kapısı hâricinde olan fırın ustası Ulus v. Mercan nâm zimmîler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ karye-i mezbûre ahâlîsinde mârrü’z-zikr Balat fırını ustası olup mukaddemâ hâlik olan mezbûr Parnak v. Parnoş v. Mori târih-i mezbûrda hâli hayâtında mülkü olup mahalle-i mezbûrede vâki‘ lede’l-ahâlî ma‘lûmü’l-hudûd değirmende olan dokuz re’s bârgîr ve beynimizde ilm-i şer‘î ile ma‘lûm âlâtın on iki sehimden altı sehmini işbu müdde‘î-yi mezbûr bizim huzûrumuzda otuz iki bin akçeye bey‘ ve temlîk ve teslîm ol dahi iştirâ ve kabûl ve ona münâsib kabz ile kabz ve tesellüm eyledikden sonra semen-i mezbûr otuz iki bin akçeyi bi’t-tamâm ahz ve istîfâ eyledi. Biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eyleriz deyü her biri edâ-i şehâdet-i şer‘iyye eylediklerinde gıbbe’t-teslîm şehâdetleri makbûle olmağın mûcebiyle ba‘de’l-hükm zikr olunan on iki sehimden altı sehmi hisseden kasr-ı yed etmek üzere vasiyy-i mezbûra tenbîh olunup mâ-vaka‘a bi’t-taleb ketb olundu. Fi’l-yevmi’l-ışrîn min-Rebî‘ülevvel li-sene mi’e ve elf. Şuhûdü’l-hâl: Ahmed b. Abdullah, el-Hâc Mustafa b. İbrahim Bey, Ahmed b., İskender, Mustafa b. İskender, Margos v. Köse, Agop v. Sahak, Mıgırdıç v. Haçuk, Karabet v. Hokaz.