İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 288 Hüküm no: 361 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Menzilcilerin ulaklara ferman ile tayin olunandan fazla beygir vermemesi Mefâhirü’l-kuzât ve’l-hükkâm ma‘denü’l-fezâ’il ve’l-kelâm Edirne’den Âsitâne-i sa‘âdetime varınca yol üzerinde vâki‘ olan kādılar zîde fazluhüm tevkî‘-i refî‘-i hümâyûn vâsıl olucak ma‘lûm ola ki bazı umûr-ı mühimme ile memûr olan ulaklar yedlerinde olan fermân-ı şerîfemde ta‘yîn olunandan ziyâde bârgîr taleb eyledikleri mesmû‘-ı hümâyûnum olmağın imdi kangı menzilci o makūle fermân-ı şerîfimle ta‘yîn olunandan ziyâde bir bârgîr verilir ise hakkından gelinmek üzere Dergâh-ı mu‘allâm çavuşlarından husûs-ı mezbûr için Kula menziline ta‘yîn olunan kıdvetü’l-emâsil ve’l-akrân Mustafa Çavuş zîde kadruhû ma‘rifetiyle ahz ve Dîvân-ı hümâyûnuma ihzâr ve düstûrü’l-amel olmak için her menzil kasabasına işbu emr-i şerîfim sicillâta kayd olunmak bâbında fermân-ı âlîşânım sâdır olmuşdur. Buyurdum ki ( ) hükm-i şerîfimle vusûl buldukda sâdır olan emrim üzere amel edip dahi her kangı menzilci fermân-ı şerîfimle ta‘yîn olunandan ziyâde bârgîr verir ise hakkından gelinmek üzere ta‘yîn olunan mübâşir-i merkūm ma‘rifetiyle ahz ve Dîvân-ı hümâyûnuma ihzâr ve düstûrü’l-amel olmak için her menzil kasabasıyla işbu emr-i şerîfim sicillâta kayd etdirilip sâdır olan emr-i şerîfim mazmûn-ı münîfi ile âmil olasız. Şöyle bilesiz alâmet-i şerîfe i‘timâd kılasız. Tahrîren fî evâhiri şehri Muharremi’l-harâm li-sene mi’e ve elf. Be yurd-ı sahrâ-i Edirne