İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 308 Hüküm no: 383 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükevkaf defterinde kayıtlı tüm vakıfların isimlerini ve mütevellileri tarafından görülen muhasebelerini içeren defterin hazırlanarak padişaha takdim edilmesi için ferman Düstûr-ı mükerrem müşîr-i müfahham nizâmü’l-âlem müdebbir-i umûri’l-cumhûr bi’l-fikri’s-sâkıb mütemmim-i mehâmmi’l-enâm bi’r-re’yi’s-sâib mümehhid-i bünyâni’d-devleti ve’l-ikbâl ve müşeyyid-i erkânü’l-izzeti ve’l-iclâl [el-]mahfûf bi sünûfi avâtıfi’l-meliki’l-a‘lâ Âsitâne-i sa‘âdetimde sadâret-i uzmâ ve kāimmakām olan vezîrim ( ) paşa edâmallâhu te‘âlâ iclâlehû akzâ kuzâti’l-müslimîn ve evlâ vülâti’l-muvahhidîn ma‘denü’l-fezâ’ili ve’l-yakīn hüccetü’l-hakkı ale’l-halki ecma‘în vâris-i ulûmi’l-enbiyâ ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul kādısı zîdet fezâ’iluhû ve kıdvetü’l-emâcidi ve’l-a‘yân Başdefterdârım vekîli Ahmed zîde mecduhû tevkî‘-i refî‘-i hümâyûn vâsıl olucak ma‘lûm ola ki; hâlâ Küçükevkāf defterlerinin aslı ve hocası ve hulefâsı İstanbul’da olup Küçükevkāf defterlerinde olan evkāfların gerek nezâretlerde olanlar ve gayrilerdir ne mikdâr evkāf var ise cümlenin îrâd [îrâd ve] mesârifleri ma‘lûm-ı hümâyûnum olmak için mütevellîlerin gördükleri muhâsebenin sûretlerini ihrâc olunup ordu-yı hümâyûnuma irsâli lâzım gelmeğin imdi emr-i şerîfim vardığı gibi İstanbul’da ne mikdâr evkāf var ise Küçükevkāf defterlerinde mukayyed olan mütevellîlerin îrâd ve mesârifi ne mikdâr ise mütevellîlerin gördükleri muhâsebesinin sıhhati ve hakīkat üzere yerlü yerinden sûretleri ihrâc ve bir gün evvel ma‘lûm-ı hümâyûnum olmak için ordu-yı hümâyûnuma irsâl ve îsâl eylemeniz bâbında fermân-ı âlîşânım sâdır olmuşdur. Buyurdum ki hükm-i şerîfimle ( ) vardıkda <> bu bâbda sâdır olan fermân-ı âlîşânım mûcebince amel edip Küçükevkāf defterinde mukayyed ve mu‘ayyen olan evkāflar ve gerek nezâretlerde ve gayriler[de] cümlenin îrâd ve mesârifi ma‘lûm olmak için mütevellîlerin gördükleri muhâsebenin yerlü yerinde sıhhat ve hakīkat üzere yerlü yerinde ve sicillâtda ve gayride sıhhati ve hakīkati üzere defterlerini ihrâca ma‘lûm-ı hümâyûnum olmak için bir gün evvel ordu-yı hümâyûnuma irsâl ve îsâl etdirip vech-i meşrûh üzere olan emr-i şerîfimin mazmûnu ve münîfi ile amel eyleyesiz. Şöyle bilesiz alâmet-i şerîfe i‘timâd kılasız. Tahrîren fi’s-sâmin ve’l-ışrîn min-Zilhicce li-sene tis‘a ve tis‘în ve elf. Harrirehû be-sahrâ-i Edirne.