İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 307 Hüküm no: 382 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangında harab olan Çiniciler içinde bulunan Mesire mescidinin Darüssaade Ağası Mustafa tarafından kendi parasıyla yeniden yapılmasına izin verildiği Akzâ kuzâtü’l müslimîn evlâ vülâti’l-muvahhidîn ma‘denü’l-fezâ’iil ve’l-yakīn hüccetü’l-hakkı ale’l-halki ecma‘în vâris-i ulûmi’l-enbiyâi ve’l-mürselîn el-muhtas bi mezîdi inâyeti’l-meliki’l-Mu‘în mevlânâ İstanbul kādısı zîde fazluhû tevkî‘-i refî‘-i hümâyûn vâsıl olucak ma‘lûm ola ki; iftihârü’l-havâs ve’l-mukarrebîn ve mu‘temedü’l-mülûk ve’s-selâtîn bi’l-fi‘il Dârüssa‘âdetim ağası olan el-Hâc Mustafa dâme ulüvvuhû ordu-yı hümâyûnuma mektûb gönderip İstanbul’da vâki‘ Ayasofya-i kebîr vakfı mahallâtından Çiniciler içinde Mescid-i Mesîre demekle ma‘rûf olan mescid ihrâk olup eser-i binâsı kalmayıp vakfın dahi binâsına müsâ‘adesi olmamağla mücerred kendi mâlıyla hasbeten lillâhi te‘âlâ binâ ve câmi‘ eylemek murâd etmekle ol bâbda izn-i hümâyûnum kılmak recâsına arz eylediğinden pâye-i serîr-i a‘lâma telhîs olundukda hatt-ı hümâyûn-ı Sa‘âdet makrûnumla izn-i hümâyûnum erzânî kılınmışdır. Buyurdum ki; sâdır olan emr üzere ol câmi‘ olacak mahal mülkünde vakfla alâkası yoğise ve mescid-i mezbûr eimme-i Hanefiyye rıdvânullâhi te‘âlâ aleyhim ecma‘în tecvîz gördükleri üzere câmi‘ olmağa sâlih ise ve müşârun-ileyh kendi mâlıyla câmi‘ eder ise vaz‘-ı minber ve edâ-yı salât-ı cum‘a ve îdi etdiresiz. Şöyle bilesiz alâmet-i şerîfe i‘timâd kılasız. Tahrîren fî evâ’ili şehri Zilhicce li-sene tis‘a ve tis‘în ve elf. Sahrâ-i Edirne.