İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 309 Hüküm no: 385 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalband el-Hâc Mustafa vakfının mütevellisi olan Hacı Halil Efendi’nin ölümü üzerine yerine Hacı Mehmed’in hasbi mütevelli tayin edildiği Merhûm Na‘lband el-Hâc Mustafa nâm <> sâhibü’l-hayrın vakfı olup mahmiye-i İstanbul’da Nevbahar mahallesinde vâki‘ bir tarafdan Halil Efendi menzili ve bir tarafdan müezzine meşrûta vakf menzil ve bir tarafdan tarîk-î hâs ve bir tarafdan tarîk-i âm ile mahdûd iki oda ve bir sofa ve havluyu müştemil vakıf menzilin mütevellîsi el-Hâc Halil Efendi b. Nasrullah fevt olmağla menzil-i mezbûra mütevellî nasb olunmak mühim ve lâzım olup müteveffâ-yı mezbûrun sulbî oğlu el-Hâc Mehmed nâm kimesne her vechile mahall ü müstahık olmağla mezbûr el-Hâc Mehmed cânib-i şer‘-i münîrden menzil-i mevkūf-ı mezbûra hasbî mütevellî nasb ve ta‘yîn olundukda ol dahi tevliyet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-hüve’l-vâkı‘ bi’t-taleb ve’l-ibtigā ketb ve imlâ olundu. Fi’l-yevmi’s-sâlis aşer min şehri Rebî‘ülevvel li-sene mi’e ve elf. Şuhûdü’l-hâl: el-Hâc Mehmed Çelebi b. Basri, Yusuf Efendi b. ( ) el-imâm, İbrahim Çelebi b. Ahmed, Ebûbekir b. Hüseyin, Abdurrahman Çelebi b. Abdi.