İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 309 Hüküm no: 386 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızının evinde sekiz ay oturup kirasını vermediği iddiasıyla Afife bt. Mehmed tarafından damadının babası Süleyman Çelebi b. Hızır’a açtığı dava Mahrûse-i İstanbul’da Atpazarı kurbünde sâkine Afife bt. Mehmed nâm hâtun ba‘de ta‘rîf-i şer‘î meclis-i şer‘-i şerîfde işbu bâ‘isü’l-vesîka Süleyman Çelebi b. Hızır nâm kimesne mahzarında üzerine da‘vâ ve takrîr-i kelâm edip mezbûr Süleyman kızım Ümmühân’ın zevci olan Abdullah’ın babası olmağla ücret-i mislini bana edâ etmek üzere bir kıt‘a mülk menzilimde sekiz ay sâkin olmağla hâlâ ücret-i mislini taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Süleyman Çelebi cevâbında fi’l-hakīka menzil-i mezbûrda ol mikdâr sâkin olduğunu ikrâr lâkin mezbûr Abdullah zevcesi menzil-i mezkûra Ümmühânî’yi tatlîk eyledikde kızım mezkûre üç bin akçe mehr-i müeccelini taleb ve da‘vâdan sonra vesâtet-i muslihîn ile mezbûre Ümmühânî mehr-i mezbûrdan geçip merkūm Abdullah’ı ibrâ etmekle mezkûre Afife dahi menzil ücretine müte‘allıka da‘vâdan beni ibrâ ve ıskāt etmişdir deyü def‘le mukābele edicek gıbbe’l-istintâk ve’l-inkâr mezbûr Süleyman Çelebi’den def‘-i meşrûhuna beyyine taleb olundukda mezbûr Süleyman Çelebi isbât için şuhûd ikāmet etdikde mezkûre Afife husûs-ı mezbûra müte‘allıka da‘vâdan mezkûr Süleyman Çelebi’yi ibrâ ve ıskāt eyediğini ikrâr ve i‘tirâf etmeğin alâ mûcibi i‘tirâfihâ mezbûr Afife bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâlis aşer min-Rebî‘ülevvel li-sene mi’e ve elf. Şuhûdü’l-hâl: Ali Ağa b. Şeyhi, Halil Ağa b. Yusuf, İbrahim Çelebi b. Ahmed ve gayruhüm.