İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 311 Hüküm no: 389 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul Dikiltaş’ta Mehmed Paşa Fırını’nda eskiden olduğu gibi has ekmek üretilmesine izin verildiği Mukābele şüd fi’l-asl. Düstûr-ı mükerrem müşîr-i müfahham nizâmü’l-âlem müdebbir-i umûri’l-cumhûr bi’l-fikri’s-sâkıb mütemmim-i mehâmmi’l-enâm bi’r-re’yi’s-sâib mümehhid-i bünyâni’d-devleti ve’l-ikbâl ve müşeyyid-i erkânü’l-devleti ve’l-iclâl el-mahfûf bi-sünûfi avâtıfi’l-meliki’l-a‘lâ bi’l-fi‘il Âsitâne-i sa‘âdetimde sadâret-i uzmâ ve vekâlet-i kübrâ kāimmakām olan vezîrim Ömer Paşa edâmallâhu te‘âlâ iclâlehû akzâ kuzâti’l-müslimîn ve evlâ vülâti’l-muvahhidîn ma‘denü’l-fezâ’ili ve’l-yakīn hüccetü’l-hakkı ale’l-halki ecma‘în vâris-i ulûmi’l-enbiyâi ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul kādısı zîdet fezâ’iluhû tevkî‘-i refî‘-i hümâyûn vâsıl olucak ma‘lûm ola ki; İstanbul’da Dikilitaş kurbünde Mehmed Paşa fırını demekle ma‘rûf fırının ekmekçisi ordu-yı hümâyûnuma arzuhâl sunup bundan akdem mâliye ve dîvân-ı hümâyûnum tarafından emr-i şerîfim ile me’zûn olup fırını merkūmda hâs ekmek tabh olunur lâkin bir müddetden beri men‘ ve ref‘ olunduğunu bildirip yine hâs ekmek tabh etmek için emr-i şerîfim recâ eylediği ecilden üslûb-ı sâbık üzere hâs ekmek tabh olunmak emrim olmuşdur buyurdum ki: ( ) vusûl buldukda bu bâbda sâdır olan emr üzere amel edip dahi sen ki vezîr-i müşârun-ileyh ve mevlânâ-yı mûmâ-ileyhsin mahrûse-i İstanbul’da Dikilitaş kurbünde Mehmed Paşa fırını demekle ma‘rûf fırında bundan akdem emr-i şerîfim ile me’zûn olup hâs ekmek tabh olunuriken ref‘ olunmağla mûcebince fırın-ı merkūmda üslûb-ı sâbık üzere yine hâs ekmek tabh etdirip hilâf-ı şer‘ [ve] kānûn ve mugāyir-i emr-i hümâyûn kimesneye muhâlefet etdirmeyesiz. Şöyle bilesiz alâmet-i şerîfe i‘timâd kılasız. Tahrîren fî evâhiri şehri Zilhicceti’ş-şerîfe li-sene tis‘a ve tis‘în ve elf. Be yurd-ı sahrâ-yı Edirne