İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 311 Hüküm no: 390 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in kocası Anadolu Ağası Mehmed Efendi’nin terekesinden mehrini ve hissesini taleb için Hacı Hasan b. Abdullah’ı vekil tayin ettiği Mahmiye-i İstanbul’da Kemal Paşa mahallesinde sâkine Rukiye bt. Mehmed nâm hâtun tarafından husûs-ı âti’z-<> zikre vekîl olup zât-ı mezbûreyi ma‘rifet-i şer‘iyye ile ârifân olan Hâfız Ahmed Efendi b. Mahmud ve Süleyman Efendi b. Osman şehâdetleriyle şer‘an vekâleti sâbite olan el-Hâc Hasan b. Abdullah meclis-i şer‘-i şerîfde işbu bâ‘isü’l-kitâb Hasan Çelebi b. Ali mahzarında bi’l-vekâle takrîr-i kelâm ve ta‘bîr-i ani’l-merâm edip müvekkile-i mezbûrenin sâbıkā zevci olup Anadolu Ağası iken fevt olan Mehmed Efendi hâl-i hayâtında mezbûrenin menzilini elli bin akçeye âhara emriyle bey‘ ve semenini kabz ve kendi mesârifine sarfla istihlâk edip kable’l-edâ fevt olmağla meblağ-ı mezbûru zimmetinde ma‘kūdün aleyh olan on beş bin akçe mehr-i müecceli ve sâir terekesinden hisse-i irsiyesini taleb ve da‘vâ ve ahz u kabz ve kendiye îsâle ve husûs-ı mezbûrun mütevakkıf olduğu umûrun küllîsine mezbûr Hasan Çelebi’yi tarafında vekîl ve nâib-i menâb nasb ve ta‘yîn eyledi dedikde ol dahi kabûl ve emr-i merâsimini edâya ta‘ahhüd etmeğin mâ-vaka‘a bi’t-taleb ketb olundu. Fi’l-yevmi’s-sâdis min-Muharremi’l-harâm li-sene mi’e ve elf. Şuhûdü’l-hâl: Ahmed Efendi b. Mahmud, Süleyman Efendi b. Osman, İbrahim Çelebi b. Ahmed.