İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 69 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kastamonu serdengeçtileri yüzbaşısı Ali Bölükbaşı b. Mustafa’nın emanet olarak verdiği Rus kölesi Şahin’i ve atınının bedelini Receb Ağa b. Mustafa’dan teslim aldığı Hâzihî mecelletü’t-tahazet fî zemeni a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fezâi’l-ve’l-ma‘âlî metbû‘i’l-efâzıl ve’l-e‘âlî hâviyyü’l-usûl ve’l-fürû‘ câmi‘ü’l-makbûl ve’l-menkūl sa‘âdetlü Abdullah Efendi fi’d-def‘ati’s-sâniyeti li-kütibi suverü’l-hüceci’l-vâkı‘a fîhâ. [Mühür: harfler belirsizdir] Bin yüz altı senesinde Kastamonu sancağı serdengeçdilerinin yüzbaşısı olan Ali Bölükbaşı b. Mustafa nâm kimesne meclis-i şer‘-i şerîf-i enverde zümre-i silâhdârânda kethudâ olan işbu râfi‘u’l-kitâb Receb Ağa b. Mustafa mahzarında ikrâr-ı tâm ve takrîr-i kelâm edip târih-i mezbûrda kuttâ‘-ı tarîk ve sâ‘î bi’l-fesâd olmak üzere beni mahrûse-i Edirne’de taraf-ı Saltanat-ı aliyye’ye hılâf-ı inhâ [ve] i‘lâm eylediklerinde bâ-fermân-ı âlî beni ahz ve habs ve yanımda mevcûd eşyâ ve gulâm iki re’s atım bey‘ olundukda işbu açık kaşlı elâ gözlü orta boylu Rusiyyü’l-asl Şahin nâm abd-i memlûküm yetmiş altı guruşa ve bir re’s kır aygır atım yirmi iki buçuk guruşa mezbûr Receb Ağa’ya bey‘ olunup kable’l-kabzı’s-semen alınmış <> ben taraf-ı Saltanat-ı Aliyye’den bâ-fermân-ı âlî afv ve habsden ıtlâk olunduğumdan sonra mevsûf-ı mezbûr kāim ve mârrü’z-zikr at müstehlek olmağla mezbûr Receb Ağa mevsûf-ı mezbûr Şahin’in aynını ve zikrolunan atın kıymet-i şer‘iyesi olan yirmi iki buçuk guruşu bana redd ü teslîm ben dahi yedinden ahz u kabz edip husûs-ı mezbûra ve sâire müte‘allika âmme-i da‘vâdan mezbûr Receb Ağa’nın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Cumâdelâhire li-sene seb‘a ve mie ve elf. Şuhûdü’l-hâl: A‘lemü’l-ulemâ’i’l-mütebahhirîn Caferzâde Şeyh Mehmed Efendi el-kādî bi-Kostantıniyye sâbıkā, umdetü’l-mevâliyyi’l-izâm Fenârîzâde es-Seyyid Ahmed Efendi el-kādî bi-Mekketi’l-mübâreke sâbıkā, umdetü’l-emâcid ve’l-ekârim İbrahim Hanzâde Beyefendi, Ahmed Çavuş b. Veli. Yevm-i isneyn fî 11 min-Cumâdelâhire sene 1107