İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 70 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu Mustafa b. Hüseyin’in evine pencere açmasına komşusu Kassandra bt. Yorgi’nin izin vermediği Husûs-ı âti’z-zikrin mahâllinde keşf ve tahrîri bâbında buyruldu-yı şerîf vârid olmağın imtisâlen-leh kıbel-i şer‘den keşf nâibimiz Abdullah Efendi b. Ali irsâl olunup ol dahi Hâssa mi‘mârlarından Dede Mehmed Halîfe b. Abdullah ve Ahmed Halîfe b. Mustafa ile mahmiye-i İstanbul’da Ali Paşa-yı Atîk mahallesinde sâkine Kassandra bt. Yorgi nâm nasrâniyenin menziline varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf eyledikde mezbûre Kassandra’nın câr-ı mülâsıkı olup merhûm Mesîh Hasan Paşa Evkāfı’ndan icâreteyn-i ma‘lûmeteyn ile bir bâb menzile mutasarrıf olan Mumcu Mustafa Beşe b. Hüseyin nâm kimesne meclis-i ma‘kūd-ı mezbûrda işbu bâ‘isetü’s-sifr mezbûre Kassandra muvâhecesinde evkāf-ı mezbûre mütevellîsi Hasan Ağa nâm kimesne tarafından husûs-ı âti’z-zikre vekîl-i şer‘îsi olan evkāf-ı mezkûre mu‘temedi İbrahim Çelebi b. Ahmed hazır olduğu hâlde ikrâr ve takrîr-i kelâm edip ber-vech-i mübeyyen benim taht-ı tasarrufumda olan menzilimin mezbûre Kassandra’nın işbu harem odası önünde vâki‘ bahçesine muttasıl mi‘mârân-ı mezbûrân mesâha eyledikleri tûlen on zirâ‘ ve kadden beş zirâ‘ inâme? duvarı münhedim olup cânib-i vakf-ı mezbûrdan elân müceddeden binâsına mübâşeret olunmağın mezbûre Kassandra’nın zikrolunan bahçesi tarafına bir pencere ihdâs murâd eylediğimde mezbûre Kassandra kadîme mugāyir benim menzilim cânibine pencere ihdâs eyleme deyü mümâna‘at ve münâza‘a etmekle ben dahi mezbûre Kassandra’nın menzili ve bahçesi tarafına kadîme mugāyir pencere vaz‘ ve ihdâs etmemek üzere ta‘ahhüd eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr Abdullah Efendi mahâllinde tahrîr ve ma‘an ba‘s olunan Mehmed Çelebi b. İbrahim ve Ahmed b. Receb ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Cumâdelâhire li-sene seb‘a ve mie ve elf. Şuhûdü’l-hâl: Mustafa Efendi el-imâm, Ali Efendi b. Mustafa, Mustafa Çelebi b. Receb, İbrahim Çelebi b. İslâm, Abdurrahman b. Süleyman, Mehmed b. Hasan, İsmail b. Abdi ve gayruhum. Yevm-i sülâsâ fî 12 min-Cumâdelâhire sene 1107