İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 86 Hüküm no: 16 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın boşandığı kocasında mehir bedelinden alacağı olduğu iddiasıyla açtığı davanın reddedildiği Yoros kazâsına tâbi‘ Anadoluhisârı’nda Sinan Efendi mahallesinde sâkine Ayşe bt. Abdullah nâm hatun meclis-i şer‘-i şerîf-i enverde sâbıkā zevci olan râfi‘u’l-kitâb Hamza b. Abdullah nâm kimesne mahzarında üzerine da‘vâ ve takrîr-i kelâm edip zevcim mezbûr Hamza bundan akdem beni bâyinen tatlîk etmekle suâl olunup zimmetinde mütekarrer ve ma‘kūdün-aleyh olan üç bin akçe mehr-i müeccelim alıverilmesi matlûbumdur dedikde gıbbe’s-suâl mezbûr Hamza cevâbında zevcem müdde‘iye-i mezbûre Ayşe yedimde olan hüccet nâtıka olduğu üzere bin yüz altı senesi Cumâdelûlâ’sı gurresinde Yoros kadısı olan Salih Efendi b. Numan huzûrunda mehr-i müecceli olan meblağ-ı merkūm üç bin akçe üzerine ve nafaka-i iddet-i ma‘lûmesi üzerine ve kendiden mütevellid sulbî sagīr oğlu Mehmed’i yedi yaşına değin kendi mâlından infâk ve iksâ etmek üzere benim ile muhâla‘a-i sahîha ile muhâla‘a edip ben dahi hul‘-ı mezkûru kabûl etmişidim. Binâen alâ zâlik meblağ-ı merkūm mütâlebesinden zimmetim berî olmuşdur deyü mazmûnu takrîr-i meşrûhuna muvâfık ve târih-i mezkûr ile müverraha ve kadı-i mûmâ-ileyhin hat ve hâtemini hâviye hüccet ibrâz edip müdde‘iye-i merkūme muvâcehesinde feth ü kırâet ve istintâk olundukda müdde‘iye-i merkūme mazmûn-ı hüccet-i mezkûru tâyi‘aten ikrâr u i‘tirâf etmeğin mûcebiyle müdde‘iye-i mezbûre ber-vech-i muharrer bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Mehmed Efendi b. ( ), İbrahim Efendi b. Ahmed ve gayruhum.