İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 84 Hüküm no: 15 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Şemseddin Efendi Mescid ve müştemilatını yeniden yaptıran vakfın mütevellisi Mehmed b. Musa’nın masraflarının tespit edildiği Husûs-ı âti’z-zikrin mahâllinde keşf ve tahrîri iltimâs olunmağın savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Ahmed Halîfe b. Abdullah ile mahmiye-i İstanbul’da el-Hâc Hasan mahallesinde vâki‘ merhûm eş-Şeyh Şemseddin Efendi vakfı olup bin yüz dört senesi Şevvali’l-mükerrem’inde vâki‘ harîkde ebniyesi muhterika olan mescid-i şerîf arsası üzerine varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde vakf-ı mezbûrun bi’l-fi‘il mütevellîsi olan işbu bâ‘isü’l-kitâb el-Hâc Mehmed b. Musa nâm kimesne meclis-i ma‘kūd-ı mezbûrda takrîr-i kelâm edip vakf-ı mezbûrun nukūdu olmayıp işbu mescid-i şerîfi bir vechile binâya taraf-ı vakfdan müsâ‘ade olmamağla şöyle mu‘attal kalmağın nıkz-ı mevcûdu olan taşları dağılıp cânib-i vakfa bi’l-külliye zarar müretteb olması emr-i mukarrer olmağın masrûfum olan meblağ vakf-ı merkūma rücû‘ etmek üzere kendi mâlım ile işbu müşâhede olunan duvarları mevcûd olunan taşı ile binâ ve mescid-i mezbûr kadîmden fevkānî olmağla tahtında olup yine vakf-ı mezbûr müstagallâtından olan işbu sagīr attar dükkânını dahi binâ eyledim hâlâ keşf ve nazar olunup masrûfum tahmîn ve takvîm olunmak matlûbumdur dedikde mi‘mâr-ı mezbûr evvelen duvar-ı mezbûru bi’l-muvâcehe mesâha eyledikde tûlen kırk yedi buçuk ve kadden üç buçuk zirâ‘ bi-hesâbı terbî‘î yüz altmış altı zirâ‘ taş duvar zirâ‘ı yirmi beşer akçeden dört bin yüz elli akçe duvar-ı mezbûr üzerinde vâki‘ bi-hesâbı mezbûr doksan zirâ‘ sakf zirâ‘ı otuzar akçeden iki bin yedi yüz akçe ve çıkrıkçı işi pencere seksen akçe ve bir sokak kapısı ma‘a çârçûbe ve köprüleme altı yüz akçe ve parmaklık için elli aded sagīr Rumeli herbiri dokuzar akçeden dört yüz elli akçe ve dükkân-ı mezbûr üzerinde tûlen altı buçuk ve arzen altı bi-hesâbı mezbûr otuz dokuz zirâ‘ sakf zirâ‘ı kırkar akçeden bin beş yüz altmış akçe ve bir Şile tabanı otuz akçe ve üç aded İznikmid direği herbiri kırkar akçeden yüz yirmi akçe ve bi-hesâbı mezbûr yirmi dört zirâ‘ kalafat tahta perde zirâ‘ı yirmi beşer akçeden altı yüz akçe ve bi-hesâbı mezbûr yirmi dört zirâ‘ dolma duvar zirâ‘ı otuzar akçeden yedi yüz yirmi akçe ve bi-hesâbı mezbûr kırk beş zirâ‘ beyâz sıva zirâ‘ı onar akçeden dört yüz elli akçe ve bir İznikmid direği kırk akçe ve dükkân-ı mezbûr içinde bi-hesâbı mezbûr on altı zirâ‘ tahta döşeme zirâ‘ı otuzar akçeden dört yüz seksen akçe ve sekiz aded ağa tahtası raf herbiri yirmişer akçeden yüz altmış akçe ve bi-hesâbı mezbûr sekiz zirâ‘ çam tahtası tavan zirâ‘ı yirmi beşer akçeden iki yüz akçe ve bi-hesâbı mezbûr on zirâ‘ teneke kepenk zirâ‘ı kırkar akçeden dört yüz akçe ve bi’r-i mâ direği yirmi akçe ve dolma için hazır olan toprak kalburlaması bin akçe ki min-haysü’l-mecmû‘ on üç bin yedi yüz altmış akçe ile ancak olur noksan ile olmak mümkün değildir deyü mi‘mârân-ı mezbûran ve Müslimûn-ı mezbûrûn icmâ‘ u ittifâk eylediklerinde vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Efendi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Cumâdelâhire li-sene seb‘a ve mie ve elf. Şuhûdü’l-hâl: İbrahim Efendi b. Receb el-müezzin, eş-Şeyh Mustafa Efendi b. eş-Şeyh Mehmed, Ömer Bey b. Hasan, Eyüb Efendi b. Ali, Mustafa Çelebi b. Osman. Yevmü’l-hamîs fî 28 min-Cumâdelâhire sene 1107