İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 88 Hüküm no: 19 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Abdullah’ın, evinden parasını çaldığı iddiasıyla Hanife bt. Abdullah’a açtığı davayı ispat edemediği Mahmiye-i İstanbul’da Uzunçarşı kurbünde İbrahim Paşa mahallesi sükkânından Süleyman b. Abdullah nâm kimesne dîvân-ı hazret-i sadrazamîde ma‘kūd meclis-i şer‘-i şerîf-i enverde câr-ı mülâsıkı olup kendinin âhar menzilinde müste’cire olan işbu râfi‘atü’l-kitâb Hanife bt. Abdullah nâm hatun mahzarında üzerine da‘vâ ve takrîr-i kelâm edip târih-i kitâbdan iki ay mukaddem ben edâ-i salât-ı Cum‘a için câmi‘-i şerîfe gittiğimde mezbûre Hanife menzilime girip mâlımdan sepet sandukam içinde mevcûd olan doksan sekiz guruşumu bi-gayr-ı hakkın ahz u kabz ve kendi mesârifine sarfla istihlâk etmişdir. Hâlâ suâl olunup meblağ-ı mezbûrun bi-tarîkı’d-damân alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda ityân-ı beyyineden ızhâr-ı acz ile istihlâf etmeğin fi’l-hakīka târih-i kitâbda müdde‘î-i mezbûrun menziline girip mâlından ber-vech-i meşrûh sepet sandıkı içinde mevcûd olan doksan sekiz guruşunu bi-gayr-ı hakkın ahz u kabz etmeyip ol vechile meblağ-ı mezbûrun reddi üzerine lâzım gelmediğine mezbûr[e] Hanife’ye yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle müdde‘î-i mezbûr el-Hâc Süleyman bilâ-beyyine bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Tezkire-i evvel Mustafa Efendi, zübdetü ashâbi’t-tastîr ve’r-rakām Tezkire-i sânî Mehmed Efendi, umdetü’l-eşbâh ve’l-a‘yân Yusuf Ağa Ser-çavuşân, fahrü’l-akrân ve’l-ekfâ Mehmed Ağa Muhzır, Halil Efendi el-imâm, Mehmed Efendi, el-Hâc Mustafa Efendi b. Eyüb, Mustafa Efendi Nâib-i recül ve gayruhum.