İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 89 Hüküm no: 20 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadızade Seyyid Mehmed Ağa b. Mehmed Efendi’nin varislerinin köle Mehmed b. Abdullah’ın terekesinin kendilerineteslim edilmesi iddiasıyla İbrahim Çelebi b. Nuh’a açtıkları davanın reddedildiği Mahmiye-i İstanbul’da İshak Paşa mahallesi ahâlîsinden iken bundan akdem vefât [eden] Kadızâde es-Seyyid Mehmed Ağa b. Mehmed Efendi b. Abdurrahman’ın sulbî sagīr oğulları Abdullah ve Salih’in vâlideleri ve tesviye-i emrlerine kıbel-i şer‘den mansûbe vasîleri olan Fâtıma bt. Rıdvan nâm hatun meclis-i şer‘-i şerîf-i enverde mahmiye-i mezbûrda Mi‘mâr Ayas mahallesinde sâkin iken bundan akdem vefât eden Mehmed b. Abdullah’ın vech-i âtî üzere bi’l-vesâye terekesine vâzı‘u’l-yed olan işbu râfi‘u’l-kitâb İbrahim Çelebi b. Nuh mahzarında bi’l-vesâye üzerine da‘vâ ve takrîr-i kelâm edip mezbûr Mehmed Çelebi sagīrân-ı mezbûrânın babaları müteveffâ-yı mezbûrun abd-i memlûku olduğu hâlde sagīrân-ı mezbûrânın babalarından sonra vefât etmekle verâseti sagīrân-ı mezbûrân ile zevcesi Ayşe nâm hatuna münhasıra iken mezbûr İbrahim Çelebi müteveffâ-yı sânî mezbûr Mehmed’in terekesini kabz edip sagīrân-ı mezbûrânın hisselerini teslîmden imtinâ‘ eder suâl olunup alıverilmesi bi’l-vesâye matlûbumdur dedikde gıbbe’s-suâl mezbûr İbrahim Çelebi cevâbında fi’l-vâki‘ müteveffâ-yı mezbûr Mehmed sagīrân-ı mezbûrânın babaları müteveffâ-yı evvel-i mezbûrun abd-i memlûku olup lâkin müteveffâ-yı mezbûr es-Seyyid Mehmed Ağa hayatında mezbûr Mehmed’i tedebbür-i mutlak ile müdebber edip fevt oldukda sülüs mâlı dahi müsâ‘id olmağla mezbûr Mehmed Ağa bilâ-lüzûm-ı si‘âye hür olup hatta mezbûr Mehmed hayatında yedimde olan hüccet nâtıka olduğu üzere bin doksan altı senesi Zilhicce’si evâsıtında Mora’da ordu kadısı olan Yahya Kâmî Efendi huzûrunda ber-vech-i muharrer hürriyetini mezbûr es-Seyyid Mehmed Ağa’nın vasîyy-i muhtârı olan Mustafa Efendi b. Ahmed muvâcehesinde da‘vâ ve müdde‘âsını hüccet-i şer‘iye nâtıka olduğu üzere udûl-i Müslimînden Mehmed Çelebi b. Hasan ve diğer Mehmed b. Abdullah şehâdetleriyle isbât edip mûmâ-ileyh Yahya Kâmî Efendi dahi ba‘de’t-ta‘dîl ve’t-tezkiye şehâdetlerini kabûl ve sülüs mâlı dahi müsâ‘id olmağla mûcebiyle mezbûr Mehmed’in bilâ-lüzûm-ı si‘âye hürriyetine hükm ve yedine hüccet dahi verdikden sonra mezbûr Mehmed fevt olup verâseti zevcesi mezbûre Ayşe ile mezbûrenin batnında olan hamle münhasıra olup ve ben haml-i mezkûra kıbel-i şer‘den vasî nasb olunmağla terekesine bi’l-vesâye vaz‘-ı yed ederim deyü mazmûnu takrîr-i meşrûhuna muvâfık ve târih-i mezkûr ile müverraha ve kadı-i mûmâ-ileyhin imzâ ve hatmini hâviye hüccet ibrâz edip müdde‘iye-i merkūme muvâcehesinde kırâet ve istintâk olundukda müdde‘iye-i merkūme mazmûn-ı hüccet-i mezkûreyi inkâr edicek mezbûr İbrahim Çelebi’den mazmûn-ı hüccet-i merkūmeyi mübeyyene beyyine taleb olundukda sâbıkā Müsâhib Mustafa Paşa merhûmun imâmı ve hâlâ Üsküdar’da Vâlide Câmi‘-i şerîfi’nde imâm olup zeyl-i hüccet-i mezkûrda ismi mastûr olan Abdülmümin Efendi b. Mehmed ve Süleymâniye rûznâmçecisi Mustafa Efendi menzilinde sâkin Abdullah Çelebi b. Bali nâm kimesneler li-ecli’ş-şehâde meclis-i şer‘a hâzırân olup isre’l-istişhâd ve fi’l-hakīka müteveffâ-yı mezbûr Mehmed b. Abdullah hayatında müteveffâ-yı evvel mezkûr es-Seyyid Mehmed Ağa b. Mehmed Efendi b. Abdurrahman hayatında mülkü olduğum hâlde beni tedebbür-i mutlak ile müdebber edip fevt oldukda sülüs mâlı dahi müsâ‘id olmağla bilâ-lüzûm si‘âyeten hür olmuşumdur deyü hüccet-i mezkûre nâtıka olduğu üzere bin doksan altı senesi Zilhicce’si evâsıtında Mora’da ordu kadısı olan mûmâ-ileyh Yahya Kâmî Efendi huzûrunda mezbûr es-Seyyid Mehmed Ağa’nın vasîsi mezbûr Mustafa Efendi b. Ahmed muvâcehesinde da‘vâ ve müdde‘âsını mezbûrân Mehmed Çelebi b. Hasan ve diğer Mehmed b. Ahmed şehâdetleriyle bizim huzûrumuzda isbât edip mûmâ-ileyh Yahya Kâmî Efendi dahi ba‘de’t-ta‘dîl ve’t-tezkiye şehâdetlerini kabûl ve sülüs mâlı dahi müsâ‘id olmağla bilâ-lüzûm si‘âyeten merkūm Mehmed’in hürriyetine bizim huzûrumuzda hükmedip yedine işbu imzâ ve hatmi hâviye hücceti vermişidi biz mazmûn-ı hüccet-i mezkûreye bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle [7a] olmağın mûcebiyle müdde‘iye-i merkūma bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Abdurrahman Efendi b. Mehmed, Mehmed Çavuş b. ( ), Mehmed Efendi b. Fazlı Hatîb-i Sultân Ahmed, İbrahim Ağa sâbıkā Çavuşbaşı.