İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 97 Hüküm no: 27 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Efendi b. Mehmed Salih Efendi ve Abdülhalim Efendi b. Mehmed Efendi’nin Mekke-i Mükerreme Kadısı Seyyid Ahmed Efendi b. Şeyh Mehmed Efendi ile olan arsa davalarında anlaştıkları Husûs-ı âti’z-zikrin mahâllinde ketb u tahrîri iltimâs olunmağın savb-ı şer‘-i mutahhardan keşf nâibimiz olan Abdullah Efendi b. Ali irsâl olunup ol dahi mahmiye-i İstanbul’da Sinan Ağa mahallesinde sâkin Mehmed Said Efendi b. el-mütevellî el-merhûm Mehmed Salih Efendi’nin menzili dâhilinde vâki‘ arsa-i hâliyeye varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘-i şerîf eylediklerinde yine mahalle-i mezbûre sükkânından sâbıkā Mekke-i Mükerreme kadısı olan umdetü’l-ulemâi’l-izâm efdalü’l-fudalâi’l-fihâm es-Seyyid Ahmed Efendi b. el-mütevellî el-merhûm eş-Şeyh Mehmed Efendi’nin kendi tarafından husûs-ı âti’z-zikre vekîl olduğu eş-Şeyh Ahmed Efendi b. Gülefşan ve Mehmed Efendi b. Ali şehâdetleriyle şer‘an sâbite olan Ahmed Ağa b. Mehmed meclis-i ma‘kūd-ı mezbûrda mezbûr Mehmed Said Efendi ile ammizâdesi Abdülhalim Efendi b. el-merhûm Mehmed Efendi mahzarlarında bi’l-vekâle ikrâr ve takrîr-i kelâm edip müvekkil-i mûmâ-ileyhin mülk menzili duvarının mezbûrân Mehmed Said Efendi ve Abdülhalim Efendi’nin işbu arsa-i hâliyeleri tarafında tûlen kırk iki ve arzen bir zirâ‘ damlalığı olup ve yine müvekkil-i mûmâ-ileyhin menzili arsasına muttasıl mezbûrânın bi-hesâbı terbî‘î dört zirâ‘ kârgir hamam duvarları mukaddemâ binâ olundukda müvekkil-i mezbûrun mülk arsası üzerine binâ olunmağın mezbûrân Mehmed Said Efendi ve Abdülhalim Efendi zikrolunan damlalık arsası bizim arsa-i hâliyemizdendir deyü da‘vâ ve müvekkil-i [mûmâ]-ileyh dahi zikrolunan on zirâ‘ kârgir hamam duvarı arsası benim menzilim arsasındandır deyü da‘vâ etmekle beynlerinde münâza‘ât-ı kesîre cereyân etmiş idi el-hâletü hâzihî beynlerine muslihûn tavassut edip müvekkil-i mûmâ-ileyh zikrolunan kırk iki zirâ‘ damlalık arsasının yirmi bir zirâ‘ından geçip ve mezbûrân Mehmed Said Efendi ve Abdülhalim Efendi dahi zikri mürûr eden on zirâ‘ kârgir hamam duvarı arsasından ve üzerinde vâki‘ enkāzından geçip ba‘de’l-yevm müvekkil-i mûmâ-ileyhin zikr [olunan] damlalığının arzı ancak buçuk zirâ‘ olur ziyâde da‘vâsından mezbûrânın zimmetlerini ibrâ ve ıskāt eyledi ve mezbûrân Mehmed Said Efendi ve Abdülhalim Efendi zikri sebk eden bi-hesâbı terbî‘î on zirâ‘ hamam duvarı arsasına ve üzerinde vâki‘ enkāza müte‘allika da‘vâdan müvekkil-i mezbûrun zimmetini ibrâ ve ıskāt eylediler dedikde gıbbe’t-tasâdiki’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Ali b. Mustafa ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Abdullah Efendi b. Mustafa, Ali Efendi b. Veli, Osman Efendi b. Ahmed Efendi, Hasan Efendi b. Ali, Ali Efendi b. Mehmed, Mustafa b. Mehmed Efendi, es-Seyyid Mustafa Çelebi b. Murtaza, Mehmed Efendi b. Ali, el-Hâc Hasan b. Abdullah, Mehmed Odabaşı b. İsmail, ve gayru[hum] mine’l-huzzâr.