İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 96 Hüküm no: 26 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun bt. Süleyman’ın boşandığı kocası Seyyid Süleyman Çelebi’de mehir, eşya ve para alacağına dair açtığı davada sulh olduğu Mahmiye-i İstanbul’da Âbid Çelebi mahallesi sâkinelerinden olup zâtı ma‘rifet-i şer‘iye ile ârifân eniştesi İbrahim Çelebi b. Veli ve İmâm Mehmed Efendi b. Mustafa ta‘rîfleriyle mu‘arrefe olan Ümmühani Hatun bt. Süleyman Efendi meclis-i şer‘-i şerîf-i enverde zevc-i mutallakı işbu râfi‘u’l-kitâb es-Seyyid Süleyman Çelebi b. Abdullah mahzarında ikrâr-ı tâm ve takrîr-i kelâm edip mezbûr es-Seyyid Süleyman Çelebi zevcim olup târih-i kitâbdan yedi gün mukaddem beni bâyinen tatlîk etmekle zimmetinde mütekarrer ve ma‘kūdün-aleyh olan altı bin beş yüz akçe mehr-i müeccelimi ve mukaddemâ kendiye mudârebeten def‘ u teslîm eylediğim iki yüz guruşu kendi mesârifine sarfla istihlâk etmekle meblağ-ı mezbûr iki yüz guruşu ve bi-tarîkı’l-âriye def‘ u teslîm eylediğim seksen guruş kıymetli bir samur paçası kürk ve herbiri sekizer guruş kıymetli iki top kutnî ve on guruş kıymetli bir nîmten sincab kürk ve beş guruş kıymetli iki göbek misk ve yüz yirmi beş guruş kıymetli birer habbe bir çift zümrüt küpe ma‘a inci askı ve bir sîm taraflı akreb sâ‘atimin a‘yânı mevcûde ise a‘yânını değil ise ba‘de’s-sübût kıyemi [kıymeti] olanın kıymet-i şer‘iyelerini ve misli olanın misillerini mezbûr es-Seyyid Süleyman Çelebi’den taleb ve da‘vâ eylediğimde beynimizde münâza‘ât-ı kesîre cereyân etmişidi. El-hâletü-hâzihî zikrolunan akreb sâ‘atin aynını bana redd ü teslîm ve mâ‘adâ eşyâ-i mezbûreyi istihlâk etmekle beynimizde muslihûn tavassut edip da‘vâ-yı mezbûremden merkūm es-Seyyid Süleyman Çelebi ile beynimizde yüz doksan guruş üzerine akd-i müsâlaha olundukda ben dahi sulh-ı mezbûru kabûl ve bedel-i sulh olan meblağ-ı mezbûr yüz doksan guruşu mezbûrun yedinden ahz u kabz edip mehr-i mezkûra ve meblağ-ı mezbûr iki yüz guruşa [ve] eşyâ-i muharrere-i mezbûreye ve bi’l-cümle târih-i kitâba gelince sâir hukuk-ı ma‘lûme ve mechûleye müte‘allika âmme-i da‘vâdan ben es-Seyyid Süleyman Çelebi’nin zimmetin ibrâ-i âmm-ı kātı‘ü’n-nizâ‘la ibrâ ve ıskāt edip ol dahi benim zimmetimi ibrâ ve ıskāt eyledi. Min-ba‘d târih-i kitâba gelince herbirimizin âhar ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-şehri Recebi’l-ferd li-sene seb‘a ve mie ve elf. Şuhûdü’l-hâl: İbrahim Efendi İmâm-ı Mirâhur-ı Şehriyârî, Ali Efendi b. Şaban, Abdullah Efendi b. Veli, Ahmed Efendi b. Mustafa, Mehmed Çelebi b. Mustafa, es-Seyyid el-Hâc Mehmed b. Sadeddin, [8b] Fethullah Efendi b. Hüseyin, es-Seyyid el-Hâc Ahmed b. Sadeddin, Mustafa b. Şaban, Osman b. Abdullah, el-Hâc Mustafa Kethudâ-yı muhzırân, İbrahim Çelebi b. Ahmed. Yevm-i sebt fî 8 min-Recebi’l-ferd li-sene 1107