İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 100 Hüküm no: 29 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer v. Kirkor ve Küçük Sefer v. Arutin’in, Üsküdarî Mahmud Efendi vakfından olan odaların yenilenmesi için yaptıkları masrafların Mustafa Ağa b. Abdullah’tan tahsili Husûs-ı âti’z-zikrin mahâllinde ketb u tahrîri ve fasl u hasmı bâbında buyruldu-yı şerîf vârid olmağın imtisâlen-leh savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Ali Halîfe b. Abdullah ve Osman Halîfe b. Abdülmennan ile mahmiye-i İstanbul’da Kumkapı hâricinde vâki‘ merhûm ve mağfûrun-leh Üsküdarî Mahmud Efendi vakfı müsakkafâtından olup iki tarafdan vakf-ı mezbûr ve bir tarafdan Nişancı Paşa-yı Cedîd vakfı ve bir tarafdan tarîk-i âm ile mahdûd Ermeni odaları üzerine varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eylediğinde bekâr tâifesinden işbu bâ‘iseyyü’s-sifr Sefer v. Kirkor ve Küçük Sefer v. Arutin nâm zimmîler meclis-i ma‘kūd-ı mezbûrda zikrolunan odalar icâreteyn-i ma‘lûmeteyn ile taht-ı tasarrufunda olan mahmiye-i mezbûrda Ahmed Ağa mahallesinde sâkin Mustafa Ağa b. Abdullah nâm kimesne tarafından husûs-ı âti’z-zikre vekîl olduğu es-Seyyid Ali Çelebi b. es-Seyyid Mehmed ve Molla Ali b. Mahmu[d] nâm kimesneler şehâdetleriyle şer‘an sâbit olan Ahmed Efendi b. Musa nâm kimesne mahzarında herbiri üzerine da‘vâ ve takrîr-i kelâm edip müvekkil-i mezbûr Mustafa Ağa taht-ı tasarrufunda olan işbu mahâlde vâki‘ fevkānî ve tahtânî on sekiz bâb oda üç mahzeni mürûr-ı eyyâm ile müşrif ve harâb olup kābil-i süknâ olmamağın mecmû‘-ı ebniyesin kal‘ edip atîk kerestesiyle mahlût neccâriye ve ırgādiye ve sâir lâzım gelen cedîd kereste ve kireç ve tuğla ve kerpiç ve kiremid cümlesi bizim üzerimize olmak üzere işbu müşâhede olunan tarz üzere yirmi iki bâb fevkānî ve tahtânî oda ve dehliz ve iki mahzen binâ edivermek üzere iki yüz elli guruşa bizimle kavl biz dahi kabûl etmekle mesârifinin sülüsânı atîk ve sülüsü cedîd işbu yirmi iki bâb oda ve iki mahzenin binâsına mübâşeret eyleyip cümle sakfı ve döşemelerini ve bazı odaların dolma duvar ve kara sıva ve ak sıva ve ocak ve misârında [musandıra] ve pencere ve kapıların binâ eyleyip lâkin ziyâde masrûfumuz olmağın hâlâ ebniye-i mezkûre keşf ve masrûfumuz tahmîn-i sahîh ile tahmîn ve takvîm olunup masrûfumuz alıverilmek matlûbumuzdur dediklerinde gıbbe’s-suâl vekîl-i mezbûr cevâbında kavl-i meşrûhlarını ikrâr lâkin müdde‘iyân-ı mezbûrânın masrûfları kavl olunan meblağ-ı mezbûr iki yüz elli beş guruşdan ziyâde olduğu ma‘lûmum değildir deyicek mi‘mârân-ı mezbûrân ebniye-i mezkûreyi bi’l-muvâcehe keşf ve mesâha eylediklerinde tûlen ve arzen bi-hesâbı terbî‘î beş yüz otuz zirâ‘ ber-vech-i meşrûh mahlût sakf zirâ‘ı on beşer akçeden yedi bin dokuz yüz elli akçe ve bi-hesâbı mezbûr iki yüz altmış zirâ‘ yassı şişeli cam tahtası tavan zirâ‘ı on ikişer akçeden üç bin yüz yirmi akçe ve bi-hesâbı mezbûr iki yüz kırk dört zirâ‘ tahta döşeme zirâ‘ı on sekiz akçeden on bin beş yüz doksan iki akçe ve bi-hesâbı mezbûr beş yüz yetmiş dokuz zirâ‘ sâde dolama duvar zirâ‘ı yirmişer akçeden iki bin sekiz yüz yirmi akçe ve on iki aded davlumbazlı ocak herbiri üçer yüz ellişer akçeden dört bin iki yüz akçe ve dokuz aded sâde ocak herbiri üçer yüz akçeden iki bin yedi yüz akçe ve on iki aded misârında [musândıra] herbiri ikişer yüz ellişer akçeden üç bin akçe ve yirmi dört aded sandık-ı dolab herbiri seksener akçeden bin dokuz yüz yirmi akçe ve on dört aded kapı ma‘a hâriciye herbiri altmışar akçeden sekiz yüz kırk akçe ve çıkrıkçı işi yirmi iki aded pencere herbiri yüzer akçeden iki bin iki yüz akçe ve iki mahzen kapısı altı yüz akçe ve fevkānî üç aded kenîf herbiri beşer yüz akçeden bin beş yüz akçe ve defa yirmi zirâ‘ dolma duvar zirâ‘ı on beşer akçeden üç yüz akçe ve yirmi iki aded yama direği herbiri on beşer akçeden üç yüz otuz akçe ve biri on iki ve biri dokuz basamak iki nerdübân iki yüz akçe ve bi-hesâbı mezbûr yüz seksen zirâ‘ duvar-ı mezbûr yüz elli altı zirâ‘ tahta perde zirâ‘ı on beşer akçeden iki bin üç yüz kırk akçe ve on bir aded İznikmid direği ma‘a başlık herbiri ellişer akçeden beş yüz elli akçe ve on sekiz bâb odanın kal‘ı mesârifi iki bin dört yüz akçe min-haysü’l-mecmû‘ altmış üç bin dokuz yüz kırk yedi akçe ile ancak eyle olur noksan ile olmak mümkün değildir deyü mi‘mârân-ı mezbûrân ile Müslimûn-ı mezbûrûn icmâ‘ u ittifâk etmeleriyle mûcebiyle meblağ-ı mezbûr altmış üç bin dokuz yüz kırk yedi akçeyi müdde‘iyân-ı mezbûrâna müvekkil-i mezbûr edâ ve teslîm etmek üzere vekîl-i mezbûra tenbîh eylediğini mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Cumâdelâhire sene [1]107 Şuhûdü’l-hâl: Abdullah Çelebi b. Ahmed el-imâm, Ali Halîfe b. ( ) el-müezzin, es-Seyyid Halil Çelebi b. es-Seyyid Mehmed, el-Hâc Abdurrahman b. İbrahim, el-Hâc Ahmed b. Süleyman, Ahmed Beşe b. Abdullah, Abdurrahman Beşe b. Mustafa, es-Seyyid Ali Çelebi, Ahmed Bey b. Abdülbaki. Yevmü’l-cum‘a fî 14 min-Recebi’l-ferd li-sene 1107