İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 102 Hüküm no: 30 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bredozmoz v. Aci Bedros’a babasından intikal eden yağhane ve aletlerindeki hissesini yağhaneyi elinde bulunduran Hacı Ali b. Hacı Hasan’ın iade etmesi Vilâyet-i Anadolu’da İncesu kasabası ahâlîsinden olup medîne-i Ankara’ya giderken esnâ-i tarîkde bundan akdem hâlik olan Aci Bedros v. Kozma v. Doz nâm zimmînin verâseti zevce-i metrûkesi Vasilye bt. Sava nâm nasrâniye ile sulbî kebîr oğulları Avrail Keşiş ve Çergiş ile hîn-i helâkinde sagīrler olup hâlâ kebîr olan âhar oğulları Bredozmoz ve Baryam’a ve sulbiye kebîre kızı Anye nâm nasrâniyeye münhasıra olup kable’l-kısme mezbûr Baryam dahi hâlik olup verâseti anası mezbûre Vasilye ile li-ebeveyn er karındaşı merkūm Bredozmoz’a münhasıra olduğu karye-i mezbûre ahâlîsinden el-Hâc Mehmed b. Abdullah ve Musa b. el-Hâc Mirza şehâdetleriyle hasm-ı şer‘î[-i] câhid mahzarında şer‘an sâbit ve tashîh-i meseleleri bi-tarîkı’l-münâsahati’ş-şer‘iye iki yüz on altı sehimden olup sihâm-ı mezbûreden otuz dört sehimi mezbûre Vasilye’ye ve kırk ikişer sehimi mezbûrân Avrail Keşiş ve Çergiş’den herbirine ve yirmi bir sehimi mezbûre Anye’ye ve yetmiş yedi sehimi mezbûre Bredozmoz’a isâbet eylediği şer‘an zâhir ve müte‘ayyen oldukdan sonra mezbûr Bredozmoz meclis-i şer‘-i şerîf-i enverde zikr-i âtî yağhâne ve âlâta vâzı‘u’l-yed olan el-Hâc Ali b. el-Hâc Hasan mahzarında üzerine da‘vâ ve takrîr-i kelâm edip arsasının merhûm İbrahim Çavuş vakfiyesinde beş yüz kırk akçe mukāta‘ası olup ebniye-i mevcûdesi mülk-i sırf olan mahmiye-i İstanbul’da Davudpaşa İskelesi kurbünde Kasab İlyas mahallesinde vâki‘ bir tarafdan el-Hâc Ali dükkânı ve iki tarafdan Küçüklanga bostanı ve bir tarafdan tarîk-i âm ile mahdûd yağhâne ebniyesinin ve içinde mevcûd iki şîrugan değirmeni ve iki bezir değirmeni ve bir mengene ve bir kadırga ve iki futa ve iki kazan ve biri tahtadan sini ve biri zîr-i zemîn iki mahzen ve sekiz küplerin nısf-ı şâyi‘leri babam mezbûr Aci Bedros’un ile’l-helâk mülk ve hakkı olup ba‘de’l-helâk mârrü’z-zikr nısf hissenin bi-tarîkı’l-münâsahati’l-merkūme iki yüz on altı sehimden yetmiş yedi sehimi ırsen bana isâbet etmiş iken mezbûr el-Hâc Ali zikrolunan nısf hissenin mecmû‘una bi-gayr-ı hakkın vâzı‘u’l-yed olmağın hâlâ suâl olunup hisse-i mezbûremden kasr-ı yed ve bana teslîme mezbûr el-Hâc Ali’ye tenbîh olunmak matlûbumdur dedikde gıbbe’s-suâl mezbûr el-Hâc Ali cevâbında fi’l-hakīka zikrolunan yağhâne ebniyesinin ve âlât-ı mezkûrenin nısf-ı şâyi‘leri müdde‘î-i mezbûrun babası merkūm Aci Bedros’un ile’l-helâk mülk ve hakkı olup ba‘de’l-helâk verese-i mezbûra ırsen isâbet etmiş iken lâkin hâlik-i mezbûr Aci Bedros’un iki yüz guruş deyn-i müsbeti olup nukūd-ı menkūle terekesi olmayıp deyn-i mezbûru edâ için zikrolunan nısf hissesi bey‘ olunmak lâzım gelmekle mezbûr Avrail Keşiş bin doksan sekiz senesi şehr-i Rebî‘ülevvel’i evâhirinde kasaba-i mezbûrede nâibü’ş-şer‘ olan Süleyman Efendi huzûrunda kendi tarafından asâleten ve müdde‘î-i mezbûr Bredozmoz ile merkūm Baryam sagīrler olup vasîleri olmağla vesâyeten mezbûretân Vasilye ve Anye asâleten zikrolunan yağhâne ebniyesinin ve âlât-ı mezkûrenin nısf-ı şâyi‘lerinde olan hisse-i merkūmelerini deyn-i mezbûru edâ için merkūm Çergis’e iki yüz guruşa herbiri asâleten ve vesâyeten bey‘ ve teslîm ol dahi iştirâ ve tesellüm ve def‘-i semen-i mezbûr edip ebniye-i mezbûre ile âlât-ı merkūmede olan nısf hissenin mecmû‘u ırsen ve şirâen mülk ve hakkı oldukdan sonra merkūm Çergis dahi sene-i mezbûre şehr-i Ramazanü’l-mübârek’inin on birinci günü zikrolunan nısf hisseyi işbu hazır bi’l-meclis Üsküdarlı Mehmed Ağa b. Abdullah’a üç yüz seksen guruşa bey‘ ve teslîm ol dahi iştirâ ve tesellüm ve def‘-i semen-i mezbûr eyledikden sonra mezbûr Mehmed Ağa dahi bin doksan dokuz senesi Şevvali’l-mükerrem’inin yirminci günü mârrü’z-zikr nısf hisseyi üç yüz elli guruşa bana bey‘ ve teslîm ben dahi iştirâ ve tesellüm ve def‘-i semen-i mezbûr edip ol vechile mülk-i müşterâm olmağla vaz‘-ı yed ederim deyü da‘vâ-yı def‘ edicek gıbbe’l-istintâk ve’l-inkâr mezbûr el-Hâc Ali’den def‘-i mezbûrunu mübeyyene beyyine taleb olundukda ityân-ı beyyine için istimhâl etmekle kirâren ve mirâren mehl-i şer‘î birle ba‘de’l-imhâl ityân-ı beyyineye bir vechile kādir olmayıp ızhâr-ı acz ile istihlâf etmeğin fi’l-hakīka babası merkūm Aci Bedros’un iki yüz guruş deyn-i müsbiti olup nukūd-ı menkūl terekesi olmayıp deyn-i mezbûru edâ için zikrolunan nısf hisseyi karındaşı merkūm Avrail Keşiş vech-i muharrer üzere asâleten ve vesâyeten ve mezkûretân Vasilye ve Anye asâleten merkūm Çerkeş’e bi’l-izni’ş-şer‘î iki yüz guruşa bey‘ ve teslîm eylediklerini bildirip müdde‘î-i merkūm Bredozmoz’a [10b] yemîn teklîf olundukda ol dahi hasbe’l-mesûl yemîn billâhillezî enzele’l-İncîle alâ İsa aleyhisselâm etmeğin mûcebiyle zikrolunan yağhâne ebniyesinin ve âlât-ı mezkûrenin nısf-ı şâyi‘lerinde bi-tarîkı’l-münâsahati’l-merkūme müdde‘î-i mezbûr Bredozmoz’un hisse-i şer‘iyesi olan yetmiş yedi sehim hisse-i şâyi‘adan müdde‘î-i mezbûra teslîme merkūm el-Hâc Ali tenbîh olunup mâ vaka‘a bi’t-taleb ketb olundu. Fi’l-yevmi’l-âşir min-şehri Recebi’l-ferd li-sene seb‘a ve mie ve elf. Şuhûdü’l-hâl: es-Seyyid Mustafa Çavuş el-Mübâşir, Mustafa Çelebi b. Abdülkadir, İvaz Beşe b. Abdullah, Abdurrahman Çelebi b. Muslu, İbrahim Çelebi b. Abdullah, Süleyman b. Abdullah, Süleyman Bey b. Mehmed, Mehmed Çelebi b. Mustafa, Ahmed Çelebi b. İbrahim, İbrahim Çelebi b. Ahmed ve gayruhum. Yevm-i sebt fî 15 min-Recebi’l-ferd sene 1107 Yevm-i ahad fî 16 Recebi’l-ferd sene 1107