İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 127 Hüküm no: 50 Orijinal metin no: [17b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hanım bt. Ahmed Ağa’nın kocası Hüseyin Çelebi b. Ahmed Efendi ile boşandıkları Mahmiye-i İstanbul’da Akşemseddin mahallesi sâkinelerinden olup zâtı ma‘rifet-i şer‘iye ile ârifân Ali Çelebi b. Mehmed ve Hasan Beşe b. Ömer ta‘rîfleriyle mu‘arrefe olan Hatice bt. Ahmed Ağa nâm hatun meclis-i şer‘-i şerîf-i enverde zevc-i dâhili bâ‘isü hâze’l-kitâb Hüseyin Çelebi b. Ahmed Efendi nâm [kimesne] mahzarında ikrâr ve takrîr-i kelâm edip zevcim mezbûr Hüseyin Çelebi ile beynimizde hüsn-i zindegânemiz olmamağla zimmetinde mütekarrer ve ma‘kūdün-aleyh olan altı bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Hüseyin Çelebi ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyete müte‘allika âmme-i da‘vâdan herbirimiz âharın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min-Recebi’l-ferd li-sene seb‘a ve mie ve elf. Şuhûdü’l-hâl: Mehmed Efendi b. Eyüb, Ali Halîfe b. Yusuf, Receb Beşe b. Ahmed, Osman Beşe b. Abdullah, Bekir Çelebi b. Hüseyin, Hüseyin Çelebi b. Mehmed, İbrahim Çelebi b. Ahmed, Ali b. Bali.