İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 126 Hüküm no: 49 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hüseyin b. Hasan’ın vefat eden Mustafa b. Hasan’dan aldığı borca Ahmed b. Davud’un kefil olduğu Mısır tüccârından olup yine Mısr-ı Kāhire’de …? mahallesinde sâkin hâlâ mahmiye-i İstanbul’da Ali Paşa kurbünde Balcıhânı’nda <> müsâferet vechi üzere sâkin olan el-Hâc Hüseyin b. Hasan nâm kimesne meclis-i şer‘-i şerîf-i enverde mahmiye-i mezbûrede Ali Paşa-yı Atîk mahallesinde sâkin iken bundan akdem vefât eden Mustafa b. Hasan nâm kimesnenin sulbî oğlu ve hasren vârisi olan Mehmed nâm sagīrin tesviye-i umûruna vasîyy-i muhtâr olan işbu bâ‘isü’l-kitâb İbrahim Çelebi b. Halil muvâcehesinde bi’t-tav‘i’s-sâf ikrâr ve takrîr-i kelâm edip müteveffâ-yı mezbûr Mustafa hâl-i hayatında târih-i kitâbdan bir sene mukaddem üç yüz yetmiş guruşunu bana ikrâz ve teslîm ve evsâfı beynimizde ma‘lûme Çerkesiyyetü’l-asl bir câriyesini dahi üç yüz guruşa bana bey‘ ve teslîm ben dahi ber-vech-i muharrer iştirâ ve tesellüm ve kabz eyleyip semeni olan meblağ-ı mezbûr üç yüz guruş ile bana ikrâz ve teslîm eylediği üç yüz yetmiş guruş ki min-haysü’l-mecmû‘ altı yüz yetmiş guruş cihet-i mezkûreden sagīre-i mezbûreye vâcibü’l-edâ ve lâzımü’l-kazâ deynimdir dedikde gıbbe’t-tasdîkı’ş-şer‘î mahmiye-i mezbûrede Müfti Ali Çelebi mahallesinde Kozalak el-Hâc Ahmed b. Davud nâm kimesne meblağ-ı mezbûr altı yüz yetmiş guruşa tarafeynden ben emr ve kabûlü hâviye kefâlet-i sahîha-i şer‘iye ile kefîl oldum dedikde gıbbe’t-tasâdiki’ş-şer‘î [mâ hüve’l-vâki‘ bi’t-taleb ketb olundu.] Fi’l-yevmi’r-râbi‘ min-şehri Recebi’l-ferd li-sene seb‘a ve mie ve elf. Şuhûdü’l-hâl: Ahmed Çelebi b. Çorbacı Mehmed Ağa, İshak Çelebi b. el-Hâc Mustafa, Süleyman Ağa b. Mehmed Ağa, Ali Beşe b. Abdullah, İbrahim Çelebi b. Ahmed, Mustafa Çelebi b. Şaban, Hasan b. Mehmed, Ahmed b. Yusuf, Ahmed Ağa b. İbrahim, İsmail b. Mustafa, Hüseyin Ağa b. Hasan, Ebûbekir Çelebi b. Halil.