İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 128 Hüküm no: 52 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa b. Ahmed’in, Garib v. Agop’a açtığı alacak davasında haksız bulunduğu Mahmiye-i İstanbul’da Bodrumhânı’nda sâkin Osman Ağa b. Ahmed nâm kimesne meclis-i şer‘-i şerîf-i enverde mahmiye-i mezbûrede merhûme Vâlide Sultân hânında sâkin işbu râfi‘u’l-kitâb Garib v. Agop nâm Ermeni muvâcehesinde üzerine da‘vâ ve takrîr-i kelâm edip bin yüz yedi senesi Muharremi’l-harâm’ı evâsıtında merkūm Garib’e bin guruşumu idâne ve teslîm ol dahi istidâne ve kabz etmişidi. Hâlâ suâl olunup alıverilmesi matlûbumdur dedikde gıbbe’s-suâl merkūm Garib cevâbında târih-i kitâb-ı mezbûrda vilâyet-i Anadolu’da Menteşe sancağı vâlîsi olan emirü’l-ulemâ’i’l-kirâm Fındık <> Mustafa Paşa’dan mârrü’z-zikr Menteşe Mütesellimliği mezbûr Osman Ağa yeğeni Abdülfettah Ağa nâm kimesne için beş bin guruşa der-uhde ve iltizâm ve mütesellimlik temessüğünü aldıkda bedel-i iltizâm olan meblağ-ı mezbûr beş bin guruşun peşîni olan bin guruşuna mahsûb olmak üzere mûmâ-ileyh Mustafa Paşa’ya def‘ ve teslîm etmek için hâlâ müdde‘âsı olan meblağ-ı mezbûr bin guruşu bi-tarîkı’l-emâne bana def‘ ve teslîm ve vech-i mezkûr üzere paşa-yı mûmâ-ileyhe teslîme emr ve tevkîl etmekle ben dahi emâneten yedinden ahz u kabz ve müdde‘â mezbûrun emrine binâen mûmâ-ileyh Mustafa Paşa’ya tamamen def‘ ve teslîm edip meblağ-ı merkūm mütâlebesinden zimmetim berî olmuşdur deyü da‘vâ-yı def‘ edicek gıbbe’l-istintâk ve’l-inkâr mezbûr Garib’den def‘-i mezbûrunu mübeyyene beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Hocapaşa kurbünde Karaki mahallesi sükkânından el-Hâc Ali Ağa b. Ahmed ve kasaba-i Beşiktaş’da Süleymâniye mahallesi sükkânından el-Hâc Mahmud Ağa b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka târih-i mezkûrda Menteşe vâlîsi olan mûmâ-ileyh Fındık Mustafa Paşa’dan Menteşe mütesellimlik temessüğü <> müdde‘î-i mezbûr Osman Ağa yeğeni Abdülfettah Ağa için beş bin guruşa der-uhde ve iltizâm ve mütesellimlik temessüğü aldıkda bedel-i iltizâm olan meblağ-ı mezbûr beş bin guruşun peşîni olup bin guruşuna mahsûb olmak üzere mûmâ-ileyh Mustafa Paşa’ya def‘ ve teslîm etmek için müdde‘î-i mezbûr Osman Ağa hâlâ müdde‘âsı olan meblağ-ı mezbûr bin guruşu bizim huzûrumuzda bi-tarîkı’l-emâne işbu mezbûr Garib’e def‘ ve teslîm ve vech-i mezkûr üzere paşa-yı mûmâ-ileyhe teslîme emr ve tevkîl etmekle mezbûr Garib dahi emâneten ahz u kabz ve müdde‘î-i mezbûrun emrine binâen mûmâ-ileyh Mustafa Paşa’ya tamamen def‘ ve teslîm edip meblağ-ı mezbûr mütâlebesinden zimmeti berî olmuşdur biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde şâhidân-ı mezbûrânın keyfiyet-i hâllerini suâl için kıbel-i şer‘den irsâl olunan el-Hâc Mustafa Efendi b. Eyüb Efendi şâhidân-ı mezbûrânın mahallelerine varıp ahâlîlerinden el-Hâc İbrahim Efendi b. Ömer el-imâm ve Halil Efendi b. Osman el-müezzin ve Yahya Efendi b. Mehmed ve Ramazan Çelebi b. Mehmed ve Ahmed Efendi b. Mustafa ve Ahmed Bey b. Mehmed ve el-Hâc Osman ve Muslu b. Mehmed ve Ahmed Efendi b. Abdullah ve el-Hâc Hasan Ağa b. Ebûbekir ve Cafer Ağa b. Abdullah ve el-Hâc Ali b. Ebûbekir ve Mehmed b. Süleyman ve Hasan Beşe b. Ramazan ve Ali b. Ali ve Halil b. Selim ve Mehmed Ağa b. Ali ve Osman Beşe b. Mehmed ve sâirleri şâhidân-ı mezbûrânın keyfiyet ve ahvâllerini suâl eyledikde onlar dahi şâhidân-ı mezbûrândan herbiri adl olup velev aleynâ makbûletü’ş-şehâdelerdir deyü haber verdiklerini mezbûr el-Hâc Mustafa Efendi mahâllinde tahrîr ba‘dehû ma‘an ba‘s olunan el-Hâc Ebûbekir Beşe b. Osman ve Şaban b. Ali ile meclis-i şer‘a gelip muvâcehelerinde inhâ ve takrîr edip şâhidân-ı mezbûrân sırren ve alenen ta‘dîl ve tezkiye ve şehâdetleri makbûle olmağın mûcebiyle müdde‘î-i mezbûr Osman Ağa bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâmis aşer min-Cumâdelâhire li-sene seb‘a ve mie ve elf. Şuhûdü’l-hâl: Umdetü’l-mevle’l-izâm Mustafa Efendi, el-kādî-i bi-Tokat sâbıkā, umdetü’l-müderrisîni’l-kirâm Vânîzâde Seyyid Mahmud Efendi, umdetü’l-müderrisîni’l-kirâm Uşakīzâde es-Seyyid İbrahim Efendi, umdetü’l-müderrisîni’l-kirâm Şaban Efendi, fahrü’l-müderrisîn Yusuf Efendi, Süleyman Efendi el-kādî, Ahmed Efendi b. ( ), Yusuf b. ( ), Ali Efendi b. ( ), el-Hâc Mustafa Kethudâ-yı muhzırân