İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 130 Hüküm no: 53 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mustafa’nın dükkânlarının etrafındaki dükkânların üzerine doğru meylettiğinden tamir etmesi Husûs-ı âti’z-zikrin mahâllinde istimâ‘ ve tahrîri bâbında buyruldu-yı şerîf vârid olmağın imtisâlen-leh savb-ı şer‘-i mutahhardan keşf nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi Hâssa mi‘mârlardan Mustafa Halîfe b. Abdullah ile mahmiye-i İstanbul’da Sultân Mehmed Câmi‘-i şerîfi kurbünde Küçükkaraman’da vâki‘ merhûm Kakaç Şemseddin vakfı müsakkafâtından olan şekerciler odalarına varıp zeyl-i vesîkada muharrerü’l-esâmî Müslimîn ve ebniye ve sukūf ahvâline ıttılâ‘-ı tâmmı olan bî-garaz kimesneler mahzarlarında akd-i meclis-i şer‘-i şerîf eylediğinde vakf-ı mezbûrdan icâreteyn-i ma‘lûmeteyn ile kepenk bakkāl dükkânına mutasarrıf olan işbu ashâbü’l-kitâb Mustafa Çelebi b. Sinan ve bir na‘lband dükkânına mutasarrıf olan diğer Mustafa Çelebi b. Sefer ve yine ona muttasıl âhar na‘lband dükkânına mutasarrıf olan Abdullah Çelebi b. Mehmed nâm kimesneler meclis-i ma‘kūd-ı mezbûrda yine vakf-ı mezbûrdan kezâlik fevkānî ve tahtânî üç bâb oda ve iki dükkâna mutasarrıfe olup mahmiye-i mezbûrda Kâtib Muslihiddin mahallesinde sâkine Ümmügülsüm bt. Mustafa nâm hatunun zevci ve tarafından husûs-ı âti’z-zikre vekîl olduğu zâtını ma‘rifet-i şer‘iye ile ârifân İbrahim Efendi b. Mehmed ve Süleyman Çelebi b. Hasan [18b] nâm kimesneler şehâdetleriyle şer‘an sâbit olan Salih Beşe b. Abdullah mahzarında vakf-ı mezbûr mütevellîsi Mehmed Ağa b. Ahmed hazır olduğu hâlde herbiri üzerine da‘vâ ve takrîr-i kelâm edip müvekkilem mezbûrenin tasarrufunda olan işbu odaları mürûr-ı eyyâm ile müşrif-i harâb olmağın bizim dükkânlarımız üzerlerine meyl ve ebniyesi dükkânlarımıza dayanmak ile bizim dükkânlarımızı dahi aşağı tarafa meyletdirmekle inhidâma bâ‘is olup zarar-bîni olmağla hâlâ keşf ve nazar olunup def‘ etdirilmek matlûbumuzdur dediklerinde mi‘mâr-ı mezbûr ile Müslimûn-ı mezkûrûn zikrolunan odalara ve dükkânlara nazar eylediklerinde fi’l-hakīka müvekkile-i mezbûrenin odalarının ebniyesi müdde‘ûn-ı mezbûrûnun dükkânları üzerine on parmak mikdârı meyledip zarar-bîni olduğu mukarrer ve muhakkak olup müvekkile-i mezbûrenin ebniye-i mezkûresinin direklerin istikāmet üzerine müceddeden vaz‘ ve ta‘mîr ve termîm ile zararı mündefi‘ olur deyü herbiri icmâ‘ u ittifâk ve haber vermeleriyle müvekkile-i mezbûre Ümmügülsüm ebniye-i mezkûresinin di[re]klerini istikāmet üzerine müceddeden vaz‘ ve ebniyesin ta‘mîr ve termîm etmek üzere vekîl-i mezbûra tenbîh eylediğini mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Cumâdelâhire li-sene seb‘a ve mie ve elf. Şuhûdü’l-hâl: Mustafa Ağa b. Mehmed, Berber Şaban Beşe b. Mehmed, İsmail b. Ali, Ali b. Ahmed, Mehmed b. Mustafa, Ali Halîfe b. Abdullah, Mustafa b. Abdullah. Yevm-i isneyn fî 10 min-Recebi’l-ferd li-sene 1107 Yevm-i sülâsâ fî 11 min-Recebi’l-ferd li-sene 1107