İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 170 Hüküm no: 87 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Ahmed’in vefat eden Ali Ağa b. Ebubekir’de olan alacağının terekesinden ödenmesi Mahmiye-i İstanbul’da Koca Mustafa Paşa mahallesinde sâkin Mustafa Ağa b. Ahmed meclis-i şer‘-i şerîf-i enverde Havâss-ı Aliyye müzâfâtından Büyükçekmece’de sâkin iken bundan akdem vefât eden Ali Ağa b. Ebûbekir b. Abdullah’ın verâseti li-ebeveyn kız karındaşı Gevher nâm hatun ile li-ebeveyn er karındaşı oğlu Hasan b. Mehmed’e münhasıra olduğu şer‘an zâhir ve müte‘ayyen oldukdan sonra müteveffâ-yı mezbûrun terekesine vâzı‘u’l-yed olduğu mütehakkık olan mezbûr Mehmed mahzarında üzerine da‘vâ ve takrîr-i kelâm edip müteveffâ-yı mezbûr Ali Ağa’ya hayatında yüz yirmi altı buçuk keyl buğdayımı bi-safkatin vâhidetin elli üç guruşa bey‘ ve teslîm ol dahi ber-vech-i muharrer iştirâ ve tesellüm ve kabz edip hatta meblağ-ı mezbûr ber-vech-i muharrer zimmetinde bana deyni olduğunu huzûr-ı Müslimînde ikrâr ve işhâd dahi etdiğinden sonra kable’l-ahz fevt olmağla mezbûr Mehmed’e suâl olunup meblağ-ı mezbûru müteveffâ-yı mezbûrun tereke-i vâfiyesinden bana edâya tenbîh olunmak matlûbumdur dedikde gıbbe’s-suâl mezbûr Mehmed cevâbında ber-vech-i muharrer tereke-i müteveffâ-yı mezbûra vaz‘-ı yedini ikrâr, deyn-i mezbûru bi’l-külliye inkâr edicek müdde‘î-i mezbûrdan müdde‘âsını mübeyyene beyyine taleb olundukda udûl-i Müslimînden olup mârrü’z-zikr Koca Mustafa Paşa mahallesinde sâkin Halil b. İbrahim ve mahmiye-i mezbûre Silivrikapısı kurbünde sâkin Hüseyin Bey b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Ağa b. Ebûbekir b. Abdullah hayatında ber-vech-i muharrer mezbûr Mustafa Ağa’ya yüz yirmi altı buçuk keyl buğday semeninden elli üç guruş zimmetinde vâcibü’l-edâ deyni olduğunu bizim huzûrumuzda ikrâr ve bizi işhâd etmişidi biz bu husûsa bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mezbûr Mustafa Ağa meblağ-ı mezbûru [29b] müteveffâ-yı mezbûrun hayatında ahz u kabz veyâ hîbe veyâhûd havâle etmeyip taraf-ı şer‘iyeden müteveffâ-yı mezbûrun zimmeti bir vechile berî olmadığına yemîn teklîf olundukda ol dahi alâ vefki’l-mesûl yemîn billâhi’l-aliyyü’l-a‘lâ etmeğin mûcebiyle meblağ-ı mezbûr elli üç guruşu müteveffâ-yı mezbûrun tereke-i vâfiyesinden mezbûr Mustafa Ağa’ya teslîme mezbûr Mehmed’e tenbîh birle mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Recebi’l-ferd li-sene seb‘a ve mie ve elf. Şuhûdü’l-hâl: Mustafa b. Şaban, İbrahim Çelebi [b.] Ahmed, Mehmed Çelebi b. İdris, Ali b. Bali.