İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 176 Hüküm no: 91 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Abdullah’ın Emetullah Hatun bt. Abdullah ve kocası Mustafa Ağa b. Mehmed ile olan alacak davasında birbirlerinin zimmetlerini ibra ettikleri Mahmiye-i İstanbul’da Mi‘mâr Ayas mahallesi sükkânından Hüseyin b. Abdullah nâm kimesne meclis-i şer‘-i şerîf-i enverde mahmiye-i mezbûrede Samanveren mahallesi sâkinelerinden Emetullah Hatun bt. Abdullah’ın zevci ve tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iye ile ârifân Süleyman b. Abdullah ve Hüseyin b. Mustafa şehâdetleriyle şer‘an sâbit olan râfi‘u’l-kitâb Mustafa Ağa b. Mehmed mahzarında ikrâr-ı tâm ve takrîr-i kelâm edip müvekkile-i mezbûre Emetullah Hatun’un sadrî oğlu olup bundan akdem bilâ-veled fevt olan Abdullah Çelebi b. Mustafa’nın hayatında taht-ı tasarrufunda olup nefs-i Bozcaada’da vâki‘ ma‘lûmü’l-hudûd tahmînen iki yüz keyl tohm isti‘âb eder tarlaları tapuya müstehak olmağla zikrolunan tarlaları iki yüz on guruş tapu ile müvekkile-i mezbûre üzerine kayd ve tahrîr etdirmeğe mezkûr Mustafa Ağa bana izn ve meblağ-ı mezbûru kendi mâlımdan sahib-i arz olan Biga Mütesellimi Ebûbekir Ağa’ya def‘ u teslîme emr ve tevkîl etmekle ben dahi [31a] mezbûrun emrine binâen kayd ve tahrîr ve meblağ-ı mezbûru kendi mâlımdan bi-şarti’r-rücû‘ merkūm Ebûbekir Ağa’ya def‘ u teslîm ve işbu tapu temessüğünü getirip kendiye teslîm edip ber-vech-i muharrer medfû‘um olan meblağ-ı mezbûrun kırk guruşunu cihet-i deyn-i şer‘îden merkūm Mustafa Ağa yedinden ahz u kabz edip ben bâkī beş guruşa ve zikrolunan tarlalara ve bedeline müte‘allika âmme-i da‘vâdan mezbûr Mustafa Ağa ile müvekkile-i mezbûre Emetullah Hatun’un zimmetlerini ibrâ-i âmm-ı kātı‘ü’n-nizâ‘la ibrâ ve ıskāt edip mezbûr Mustafa Ağa dahi bana medfû‘u olan meblağ-ı mezbûra ve cihet-i merkūmeden zimmetimde hakkı olan kırk guruşa müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-şehri Recebi’l-ferd li-sene seb‘a ve mie ve elf. Şuhûdü’l-hâl: Mehmed Çavuş b. Abdullah, el-Hâc Ahmed Ağa b. Abdullah, el-Hâc Süleyman b. Abdullah, Ali Efendi b. Abdurrahman, Ahmed Çelebi b. Mahmud, Mehmed Ağa Ser-muhzırân, Mustafa b. Şaban, Ali b. Bali, Mustafa Çelebi b. Ahmed. Yevm-i isneyn fî 8 min-Şa‘bâni’l-mu‘azzam li-sene 1107