İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 237 Hüküm no: 150 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kavukçu Sefer v. Sergiz ile Norsis v. Ağya’nın yaptıkları çuka satışını iptal ettikleri Kavukçu tâifesinden olup mahmiye-i İstanbul’da Bezzâzistân kurbünde sâkin Sefer v. Sergiz nâm zimmî meclis-i şer‘-i şerîf-i enverde Norsis v. Ağya nâm zimmî muvâcehesinde üzerine da‘vâ ve takrîr-i kelâm edip târih-i kitâbdan on gün mukaddem mezbûr Norsis yirmi iki zirâ‘ mavi Londra çukasını bana kırk dokuz buçuk guruşa bey‘ ve temlîk ve teslîm ben dahi yedinden ba‘de’l-iştirâ ve’t-temellük semeni olan kırk dokuz buçuk guruşu mezbûr Norsis yedine def‘ u teslîm etdiğimden sonra rızâmız ile bey‘-ı mezbûru beynimizde fesh ve ikāle ve makbûzum olan mârrü’z-zikr yirmi iki zirâ‘ çuka[yı] mezbûr Norsis’e teslîm etmekle benden makbûzu olan meblağ-ı mezbûr kırk dokuz buçuk guruşu mezbûr Norsis’den taleb ederim suâl olunup alıverilmesi matlûbumdur dedikde gıbbe’s-suâl mezbûr Norsis cevâbında fi’l-hakīka ber-vech-i muharrer mezbûr Sefer zimmîye yirmi iki zirâ‘ çukasını kırk dokuz buçuk guruşa bey‘ ve kabz-ı semen etdikden sonra bey‘-ı mezbûru ikāle etmekle makbûzu olan meblağ-ı mezbûr kırk dokuz buçuk guruş zimmetinde vâcibü’l-edâ deyni olduğunu ikrâr u i‘tirâf etmeğin alâ mûceb-i i‘tirâfihî meblağ-ı mezbûr kırk dokuz buçuk guruşu müdde‘î-i mezbûr Sefer’e edâ ve teslîme mezbûr Norsis zimmîye tenbîh birle mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Mehmed, Ali b. Bali, Mehmed b. İdris, Ali b. Bali , Ahmed b. Ahmed, Receb b. Süleyman. Yevmü’s-sülâsâ fî 8 min-Ramazani’l-mübârek