İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 246 Hüküm no: 155 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Kasım’ın İbrahim Ağa b. Mehmed’e olan borcunu ödemesi Mahmiye-i İstanbul’da Çelebioğlu mahallesinde sâkin İbrahim Ağa b. Mehmed meclis-i şer‘-i şerîf-i enverde Mehmed Ağa b. Kasım mahzarında üzerine da‘vâ ve takrîr-i kelâm edip mezbûr Mehmed Ağa yedime verdiği bin yüz altı senesi şehr-i Ramazanü’l-mübârek’inin gurresiyle müverraha temessüğü mûcebince mezbûrun zimmetinde cihet-i deyn-i şer‘den dokuz yüz guruş hakkım olup meblağ-ı mezbûrun üç yüz elli yedi guruşunu ahz u kabz edip bâkī zimmetinde beş yüz kırk üç guruş hakkım kalmağla mezbûr Mehmed Ağa’ya suâl olunup <> meblağ-ı bâkī-i mezbûru dahi bana teslîme tenbîh olunmak matlûbumdur dedikde gıbbe’s-suâl mezbûr Mehmed Ağa cevâbında ben meblağ-ı mezbûrdan mezbûr İbrahim Ağa yedinden ancak altı yüz yirmi üç guruş kabz edip bâkī iki yüz yetmiş yedi guruş mezbûr İbrahim Ağa bana aldım deyü temessük ver ba‘dehû ben meblağ-ı mezbûru sana veririm demesiyle kâziben ikrâr ve yedine işbu temessüğü verdim deyicek mezbûr Mehmed Ağa ber-vech-i muharrer ikrârına kâzib olmayıp ve kendi dahi da‘vâsında mubtıl olmadığına mezbûr İbrahim Ağa’ya yemîn lâzım gelmekle bi’t-taleb yemîn teklîf olundukda ol dahi alâ vefki’l-mesûl yemîn billâhi’l-aliyyü’l-a‘lâ etmeğin mûcebince meblağ-ı bâkī-i mezbûr beş yüz kırk üç guruşu mezbûr İbrahim Ağa’ya edâ ve teslîme mezbûr Mehmed Ağa’ya tenbîh birle mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mustafa Çavuş b. Mehmed, el-Hâc Mustafa b. Abdullah, Abdurrahman Çelebi b. Mehmed, İbrahim Çelebi b. Ahmed, Ahmed b. Ahmed, Mustafa b. Şaban, Ali b. Bali