İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 247 Hüküm no: 156 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi b. Mahmud’un dedesine ait olup Abdullah Çelebi b. Seyyid Fazlullah’a satılan arsadaki hissesi bedeli niteslim aldığı Yevmü’l-hâmis fî 10 min-şehri Ramazani’l-mübârek. Mahmiye-i İstanbul’da Ahmed Ağa mahallesinde sâkin iken bundan akdem vefât eden es-Seyyid Ali Çelebi b. Mustafa’nın verâseti zevce-i metrûkesi Ayşe Hatun bt. Mehmed ile sulbiye oğlu es-Seyyid Mehmed Çelebi ve sulbiye kızları Şerife Hatice ve Şerife Hamide ve Şerife Ümmühani’ye münhasıra olup ba‘dehû mezbûr es-Seyyid Mehmed dahi fevt olup verâseti vâlidesi mezbûre Ayşe Hatun ile li-ebeveyn kız karındaşları mezbûrât Şerife Hatice ve Şerife Hamide ve Şerife Ümmühani’ye münhasıra olup ba‘dehû mezbûr Şerife Ümmühani dahi fevt olup verâseti vâlidesi mezbûre Ayşe Hatun ile li-ebeveyn kız karındaşları mezbûretân Şerife Hatice ve Şerife Hamide’ye münhasıra olup ba‘dehâ mezbûre Şerife Hatice dahi fevt olup verâseti sadrî kebîr oğlu es-Seyyid Hüseyin Çelebi b. Mahmud’a münhasıra olduğu şer‘an zâhir ve müte‘ayyen oldukdan sonra mezbûr es-Seyyid Hüseyin Çelebi meclis-i şer‘-i şerîf-i enverde mahalle-i mezbûre sükkânından işbu râfi‘u’l-kitâb es-Seyyid Abdullah Çelebi b. es-Seyyid Fazlullah mahzarında ikrâr-ı tâm ve takrîr-i kelâm edip mahalle-i mezbûrede vâki‘ iki tarafdan Süleyman Efendi mülkü ve bir tarafdan Mehmed Çavuş mülkü ve bir tarafdan tarîk-i âm ile mahdûd menzilin arsası ve mukaddemâ mevcûd olan ebniyesi merhûme Safiye Sultân nâm sahibetü’l-hayrın süknâya muhtâc sâdât-ı kirâmdan birine meşrûta vakfı olup menzil-i mezbûr tevcîh-i hâkimü’ş-şer‘le müteveffâ-yı evvel mezbûr es-Seyyid Ali Çelebi’nin tasarrufunda iken menzil-i mezbûre muhterik olup arsa-i sırfa kalıp ba‘dehû mezbûr es-Seyyid [Ali] Çelebi arsa-i mezbûre üzerine kendi mâlıyla nefsi’çün ebniye ihdâs eyledikden sonra ebniye-i mezbûre tekrar muhterik oldukda enkāz-ı memlûkesi yedinde iken mezbûr es-Seyyid Ali Çelebi fevt olup enkāz-ı mezkûre zevcesi mezbûre Ayşe ile oğlu merkūm es-Seyyid Mehmed Çelebi’ye ve kızları mezbûrât Şerife Hatice ve Şerife Hamide ve Şerife Ümmühani’ye isâbet etmiş iken ancak mezbûre Şerife Hatice merhûm-ı merkūm es-Seyyid [Ali] Çelebi’nin kendiden gayrı vâris-i ma‘rûf ve ma‘rûfesi olmayıp hasren vâris olmak üzere enkāz-ı mezbûreyi kırk guruşa mezbûr es-Seyyid Abdullah Çelebi’ye bey‘ ve teslîm edip ben dahi bey‘-ı mezkûru mücîz olmağla semen-i mezbûrdan hisse-i şer‘iyemi mezbûr es-Seyyid Abdullah Çelebi’den ba‘de’d-da‘vâ ve’l-münâza‘a vesâtat-ı müslihîn ile da‘vâ-yı mezbûremden beynimizde [yedi] guruş üzerine akd-i müsâlaha olundukda ben dahi sulh-ı mezbûru kabûl ve bedel-i sulh-ı mezbûr yedi guruşu mezbûr es-Seyyid Abdullah Çelebi yedinden ahz u kabz edip mâ‘adâsına ve enkāz-ı mezbûreye ve sâire müte‘allika âmme-i da‘vâdan merkūm es-Seyyid Abdullah Çelebi’nin zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: el-Hâc Hasan Efendi b. Hüseyin, İmâm Ali Efendi b. ( ), es-Seyyid Halil Çavuş b. ( ), Mustafa Efendi el-müezzin, es-Seyyid Hızır Çavuş b. ( ).