İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 249 Hüküm no: 158 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Rona’nın alacaklısı olduğu Diyârbekirli Seyyid Halid Çelebi b. Seyyid Ali’nin borcunu ödemesine tenbih olunduğu Fi’l-asl vilâyet-i Rumeli’nde Tırnova kazâsına tâbi‘ Arnavud nâm karye ahâlîsinden olup hâlâ mahmiye-i İstanbul’da Vâlide hânında müsâfiren sâkin işbu [bâ‘isü]l-vesîka Dimitri v. Rona nâm zimmî dîvân-ı hazret-i sadrazamîde ma‘kūd meclis-i şer‘-i şerîf-i enverde Diyârbekirli es-Seyyid Halid Çelebi b. es-Seyyid Ali mahzarında üzerine da‘vâ ve takrîr-i kelâm edip bin yüz beş senesi Şevvali’l-mükerrem’inde ben ticâret ile medîne-i Tokat’a vardığımda mezbûr es-Seyyid Halid Çelebi onda bulunmağla beni ahz ve habs etdirip Köse Yorgi nâm zimmî zimmetinde sahtiyân bahâsından olan hakkıma sen kefil olmuşidin deyü benden bir defa altı yüz otuz guruş ve bir defa yüz yirmi beş guruş cem‘an yedi yüz elli beş guruşumu cebren ahz u kabz ve kendi mesârifine [53a] sarfla istihlâk etmişidi hâlâ suâl olunup alıverilmesi matlûbumdur dedikde gıbbe’s-suâl mezbûr es-Seyyid Halid Çelebi cevâbında fi’l-hakīka mezkûr Köse Yorgi v. Petre zimmetinde sahtiyân bahâsından altı yüz otuz guruş hakkım olup meblağ-ı mezbûr altı yüz otuz guruşa müdde‘î-i mezbûr Dimitri kefîl olmağla meblağ-ı mezbûr altı yüz otuz guruşu kefâletine binâen müdde‘î-i mezbûr Dimitri’den ahz u kabz eyledim deyü meblağ-ı mezbûr yedi yüz elli beş guruşun altı yüz otuz guruşu için da‘vâ-yı def‘ ve ziyâde yüz yirmi beş guruş kabzını inkâr edicek gıbbe’l-istintâk ve’l-inkâr evvelen müdde‘î-i mezbûrdan ziyâde müdde‘âsına beyyine taleb olundukda ityân-ı beyyine için istimhâl etmekle mehl-i şer‘î birle ba‘de’l-imhâl sâniyen merkūm es-Seyyid Halid Çelebi’den def‘-i mezbûrunu mübeyyene beyyine taleb olundukda ityân-ı beyyine için istimhâl etmekle kirâren ve mirâren mehl-i şer‘î birle ba‘de’l-imhâl ityân-ı beyyineye bir vechile kādir olmayıp ızhâr-ı acz edip tahlîfe dahi tâlib olmamağın mûcebiyle meblağ-ı mezbûr altı yüz otuz guruşu müdde‘î-i mezbûr Dimitri’ye edâ ve teslîme mezbûr es-Seyyid Halid Çelebi’ye tenbîh olunup mâ hüve’l-vâki‘ bi’t-taleb ketb olundu. Fi’l-yevmi’s-sâmin min-şehri Ramazani’l-mübârek li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Tezkire-i evvel Mustafa Efendi, zübdetü ashâbi’t-tastîr ve’r-rakām Tezkire-i sânî Mustafa Efendi, fahrü’l-eşbâh ve’l-a‘yân Yusuf Bey Ser-çavuşân, umdetü’l-a‘yân ve’l-akrân el-Hâc Mehmed Ağa Muhzır, Halil b. Mehmed, Ali Beşe b. Sinan, Receb b. Osman, Ali b. Bali ve gayruhum. Yevmü’l-Cum‘a fî 11 min-şehri Ramazani’l-mübârek Yevmü’s-sebt fî 12 min-şehri Ramazani’l-mübârek