İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 250 Hüküm no: 159 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Zülfikar’ın kaybolan cariyesini zapt eden Kaya Hanım’ın cariyeyi iade etmesi Medîne-i Edirne’de Beyceğiz mahallesi sâkinelerinden Fâtıma Hatun bt. Zülfikar b. Hasan tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iye ile ârifân Ali Bey b. Mustafa ve diğer Ali Bey b. Ahmed şehâdetleriyle şer‘an sâbit olan Yusuf Ağa b. Hüseyin nâm kimesne meclis-i şer‘-i şerîf-i enverde medîne-i Üsküdar’da sâkine olup zikri âtî câriyeye vaz‘-ı yedi sâbit olan Ramazan oğlu Mahmud Paşa kızı demekle ma‘rûfe Kaya Hanım tarafından husûs-ı câi’z-zikre vekîl-i müsecceli olan Râbia Hatun bt. Abdullah mahzarında bi’l-vekâle üzerine da‘vâ ve takrîr-i kelâm edip işbu meclis-i şer‘de müşâhede olunan açık kaşlı elâ gözlü orta boylu Rusiyyetü’l-asl sâbıkā Bavi ismi ile müsemmât olup hâlâ Fethi tesmiye olunan câriyeyi müvekkilem mezbûre Fâtıma Hatun târih-i kitâbdan on sene mukaddem Ustoni [İstolni] Belgrad’ında zevci Murtaza alay beyi yediyle Kazgancı şeyhi kızı Hatice nâm hatundan semen-i ma‘lûme iştirâ ve temellük edip câriye-i memlûkesi oldukdan sonra târih-i kitâbdan dört sene mukaddem mevsûfe-i mezbûre müvekkilem ile medîne-i Üsküdar’a geldikde mülkünden [i]bâk etmekle zâyi‘ olmuşidi hâlâ mezbûre Kaya Hanım yedinde buldum suâl olunup alıverilmesi matlûbumdur dedikde gıbbe’s-suâl vekîl-i mezbûre cevâbında mevsûfe-i mezbûreye müvekkilesi mezbûre Kaya Hanım’ın mülk-i müşterâsı olmak üzere vaz‘-ı yedini ikrâr lâkin müdde‘î-i mezbûrun müvekkilesi mezbûre Fâtıma Hatun’un ber-vech-i muharrer mülk-i müşterâsı olmağla mülkünden ibâk eylediğini inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden ve zümre-i sipâhiyândan olmağla târih-i mezbûrda mezkûr Murtaza alay beyi ile ma‘an sâlifü’z-zikr İsto[l]ni Belgrad’ında olup hâlâ mahmiye-i İstanbul’da Atmeydânı kurbünde müsâfiren sâkinler olan müvekkilem mezbûrenin zâtını ârifân Mustafa Bey b. Ali ve Hüseyin Bey b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu mevsûfe-i mezbûre Fethi’yi müvekkile-i mezbûre Fâtıma Hatun bt. Zülfikar b. Hasan târih-i kitâbdan on sene mukaddem İstolni Belgrad’ında zevci mezbûr Murtaza alay beyi yediyle Kazgancı Şeyhi kızı mezbûre Hatice’den bizim huzûrumuzda semen-i ma‘lûma iştirâ ve temellük edip câriye-i memlûkesi oldukdan sonra târih-i kitâbdan dört sene mukaddem mevsûfe-i mezbûre Fethi merkūme Fâtıma Hatun ile medîne-i Üsküdar’a geldikde mülkünden ibâk edip zâyi‘ olmuşidi hâlâ mevsûfe-i mezbûre Fethi müvekkile-i mezbûre Fâtıma Hatun’un câriye-i memlûkesi olduğuna bu vech üzere şâhidleriz şehâdet dahi ederiz deyü herbiri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mevkūfen alâ yemîni’l-müvekkileti’l-mezbûre mûcebiyle ba‘de’l-hükm ve’t-tenbîh [53b] mâ hüve’l-vâki‘ bi’t-taleb ketb olundu. Fî gurre-i şehr-i Ramazani’l-mübârek li-sene seb‘a ve mie ve elf. Şuhûdü’l-hâl: Ali Bey b. Mustafa, Ali Bey b. Ahmed, Mehmed Çelebi b. İbrahim, Mustafa Bey b. Ali, Hüseyin Bey b. Mustafa, Mehmed Efendi İmâm-ı Çerâğī Hamza. Yevmü’l-ahad fî 13 min-şehri Ramazani’l-mübârek sene 1107