İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 312 Hüküm no: 213 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülistan v. Telender’in Todori v. Kozma’dan iddia ettiği alacak davasını ispatlayamadığı Bağcı tâifesinden Gülistan v. Kalender nâm zimmî meclis-i şer‘-i şerîf-i enverde bâ’isü hâzihi’s-sifr Todori v. Kozma muvâcehesinde üzerine da‘vâ ve takrîr-i kelâm edip mezbûrûn mukaddemâ bağcılık san‘atında şerîkler olmağla fesh-i akd-i şirket edip beynimizde hesâb gördüğümüzde yetmiş beş guruş ribhinden ve mecmû‘u beş guruş kıymetli beynimizde ma‘lûm küşne bahâsından ve on iki keyl-i Bağdâdî semenlerinden cem‘an seksen guruş mezbûr Todori yedinde kalmağla suâl olunup meblağ-ı mezbûr seksen guruşdan bana isâbet eden kırk guruşun alıverilmesi matlûbumdur dedikde gıbbe’s-suâl merkūm Todori cevâbında müdde‘î-i merkūm ile ber-vech-i muharrer mukaddemâ şerîkler olup fesh-i akd-i şirket eylediğini ikrâr lâkin meblağ-ı merkūm ile küşne ve buğdây semenlerinden olan beş guruşu ahz u kabz eylediğini inkâr etmeğin müdde‘î-i mezbûrdan müdde‘âsını mübeyyene beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka meblağ-ı merkūm yetmiş beş guruş ile mârrü’z-zikr küşne ve buğdây semenlerinden olan beş guruşu ber-vech-i muharrer kabz etmeyip meblağ-ı mezbûrdan müdde‘î-i mezbûrun hissesi olan kırk guruşu el ân üzerine edâ lâzım olduğuna mezbûr Todori’ye teklîf olundukda ol dahi yemîn billâhillezî enzele’l-incîli alâ İsa aleyhisselâm etmeğin mûcebince müdde‘î-i mezbûr ber-vech-i muharrer bilâ-beyyine bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’t-tasi‘ aşar min-Şevvali’l-mükerrem li-sene [1]107 Şuhûdü’l-hâl: Mustafa Çelebi b. Şaban, İbrahim Çelebi b. Ahmed, Hüseyin Çelebi, Ahmed b. Ahmed, Necmeddin Efendi b. Veli.