İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 311 Hüküm no: 212 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferayi v. Yani ile kızı Susanna bt. Ferayi’nin müştereken sahibi oldukları evin pencerelerini kapatacak şekilde çatı yaptıran komşuları Londari’nin men edilmesi Husûs-ı âti’z-zikrin mahâllinde ketb ve tahrîri içün sâdır olan fermân-ı şerîfe imtisâlen savb-ı şer‘den memûren irsâl olunan İbrahim Efendi b. Mehmed el-Hamîdî hâssa mi‘mârlarından Üstâd Ali Halîfe b. Abdullah ve zeyl-i kitâbda muharrerü’l-esâmî Müslimîn ile mahmiye-i İstanbul’da Edirne kapısı kurbünde Ali Paşa-yı atîk mahallesinde vâki‘ lede’l-ahâlî ve’l-cîrân ma‘lûmü’l-hudûd Susanna bt. Ferayi nâm nasrâniye ile babası Ferayi v. Yani nâm zimmînin ale’l-iştirâk silk-i mülklerinde münselik olan menzillerine varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mezbûr[e] Susanna asâleten ve mezbûr Papa Karali nâm zimmî tarafından husûs-ı âti’l-beyâna vekîl olduğu Paskal v. Yorgaki ve Yorgaki v. Yuvan nâm zimmîler şehâdetleriyle şer‘an sâbit olan Roskoli v. Yani vekâleten meclis-i ma‘kūd-ı mezbûrda câr-ı mülâsıkı Londari v. Niko nâm zimmî muvâcehesinde her biri üzerine da‘vâ ve takrîr-i kelâm edip mezbûr Londari bizim mülk menzilimizin işbu ikinci tabakada vâki‘ odamızın kadîmî olan bir aded penceresini ve üç aded duvar camlarını sed edip tahta-pûşi üzerine müceddeden bir oda binâ etmek murâd edip mu‘âyene olunan işbu sakf ihdâs etmeğin bizim odamızın zıyâsını giderüp karanlıktan hiçbir amele mecâl muhâl olup zarar fâhiş olmağla ba‘de’l-mu‘âyene suâl olunup zarar-ı şer‘îsi def‘ olunmak matlûbumdur dedikde kazıyye minvâl-i muharrer üzere olduğu ba‘de’l-mu‘âyene ve’l-müşâhede suâl olundukda mezbûr Londari cevâbında ber-vech-i muharrer pencereyi ve üç aded mezbûrânın mülk menzillerinin ikinci tabakada vâki‘ odalarının camlarını sed edip kendi menzilinin tahta-pûşi üzerine mârrü’z-zikr sakf ihdâs etdiğini ikrâr, ber-vech-i muharrer zıyâsına mâni‘ olduğunu inkâr edicek mi‘mâr -ı mezbûr muslihûn-ı mezkûrûn, ber-vech-i muharrer nazar etdiklerinde fi’l-hakīka mezbûrânın odasının üç aded camlarını ve bir aded penceresini mezbûr Londari sed edip üzerine sakf ihdâs etmekle oda-i mezbûrenin ziyâsını giderüp karanlık olup bir vechile amele mecâl muhâl olup zarar [70a] fâhiş olduğunu alâ tarîkı’ş-şehâde haber vermeleriyle lede’ş-şer‘-i’l-enver zarar fâhiş olduğu şer‘an müte‘yyin ber-vech-i muharrer ziyâsına mâni‘ olmayıp zarar-ı şer‘îsini def‘a mezbûr Londari’ye [tenbih ile] mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Ali b. Bali ve Mehmed b. Mehmed ile meclis-i şer‘-i şerîfe gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Şevvali’l-mükerrem sene [1]107 Şuhûdü’l-hâl: İmâm İbrahim Efendi b. Ali, Abdurrahman Efendi b. Mehmed Efendi, İbrahim Çelebi b. Mehmed, İsmail Efendi b. Abdurrahman, Mehmed Çelebi b. Dilaver.