İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 314 Hüküm no: 215 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zefir, Kostantin ve Luksandıra’nın vefat eden babaları Mihail v. Yorgi’den kendilerine kalan bağdaki hisselerini kardeşleri Yorga’ya sattıkları Mahmiye-i İstanbul’da Seferikoz mahallesinde sâkin iken bundan akdem hâlik olan Mihal v. Yorgi nâm zimmînin verâseti sulbî kebîr oğlu Yorgi ve sulbiye kebîre kızları Zafir ve Kostaniye ve Luksandıra nâm nasrâniyelere münhasıra olduğu zâhir oldukdan sonra mezbûrât taraflarından husûs-ı âti’l-beyâna vekîl olduğu mezbûratın zâtlarını ma‘rifet-i şer‘iyye ile arifân olan Bako v. Yani ve Yemandi v. Kostantin nâm zimmîler şehâdetleriyle şer‘an sâbit olan Yemandi v. Toma meclis-i şer‘-i şerîf-i enverde mezbûr Yorgi mahzarında bi’l-vekâle ikrâr ve takrîr-i kelâm edip mezkûr ile’l-helâk yedinde mülk ve hakkı olup ba‘de’l-helâk verese-i mezbûrûna isâbet ve intikāl eden mahrûse-i Galata’da fundalık demekle ma‘rûf mevzi‘de vâki‘ bir tarafdan müşteri-i mezbûr bağı ve bir tarafdan Papa Manol bağı ve bir tarafdan bâyi‘-i mezbûr bağı ve bir tarafdan tarîk-i âm ile mahdûd bir kıt‘a mülk bağda olan hisse-i şâyi‘alarını bi cümleti’t-tevâbi‘ ve’l-levâhık bi-safkatin vâhidetin tarafeynden îcâb ve kabûlü hâvî bey‘-i kat‘î ile mezbûr Yorgi’ye elli guruşa bey‘ ve temlîk ve teslîm ol dahi iştirâ ve temellük ve tesellüm ve temellük ve kabûl eylediğinden sonra semeni olan meblağ-ı mezbûr elli guruşu mezbûr Yorgi yedinden bi’t-tamam ahz u kabz eyledim ba‘de’l-yevm bağ-ı mezbûrda hisse-i şâyi‘alarında alakaları kalmayıp mezbûr Yorgi’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşar min-Şevvali’l-mükerrem sene [1]107 Şuhûdü’l-hâl: Mehmed Efendi b. İsmail, Hasan Efendi b. Ali, İbrahim Çelebi b. Ahmed, İbrahim Çelebi b. Mehmed.