İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 314 Hüküm no: 216 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Mehmed Efendi’nin evini Abdülbaki Efendi’ye sattığı Mahmiye-i İstanbul’da Mollahüsrev mahallesi sâkinlerinden Ahmed Çelebi b. Mehmed Efendi nâm kimesne meclis-i şer‘-i şerîf-i Ahmedî’de ve mahfel-i dîn-i münîf-i Muhammedîde bâ‘is-i hâze’l-kitâb es-Seyyid Abdülbaki Efendi b. İbrahim nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup arsasının senede merhûm Mustafa Paşa Vakfı’na on akçe mukāta‘a-i kadîmesi olan mahalle-i mezbûrede vâki‘ bir tarafdan Mehmed Efendi mülkü ve bir tarafdan Dellâk Hüseyin Beşe mülkü ve bir tarafdan hamam hazînesi, ve bir tarafdan tarîk-i âm ile mahdûd tabaka-i ulyâda bir bâb oda ve bir sofa ve vüstâda bir bâb oda ve süflâda bir matbah ve bir kenîfi müştemil mülk menzilimi cümle tevâbi‘ ve levâhıkı ve kâffe-i hukūk ve merâfıkı ile mezbûr es-Seyyid Abdülbaki Efendi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile doksan beş guruşa bey‘ ve temlîk ve teslîm ol dahi ber-vech-i muharrer iştirâ ve tesellüm ve temellük ve kabz ve kabûl etdiğinden sonra semeni olan meblağ-ı mezbûr doksan beş guruşu mezbûr es-Seyyid Abdülbaki Efendi yedinden tamamen ahz u kabz eyledim ba‘de’l-yevm menzil-i mahdûd-ı mezkûr mezbûr es-Seyyid Abdülbaki Efendi’nin mülk-i müşterâsı ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Şevvali’l-mükerrem li-sene seb‘a ve mie ve elf Şuhûdü’l-hâl: <> İmâm Mehmed Efendi b. Mehmed Efendi, İmâm Mustafa Efendi b. Ramazan.