İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 319 Hüküm no: 223 Orijinal metin no: [72a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ahmed’in kocası İbrahim b. Ramazan’dan muhâlaa yoluyla boşandığı Mahmiye-i İstanbul’da Beyceğiz mahallesi sâkinelerinden olup zâtı ma‘rifet-i şer‘iyye ile ârifân Ahmed bin İsmail ve Hüseyin b. İsmail nâm kimesneler ta‘rîfleriyle mu‘arrefe olan Fâtıma bt. Ahmed nâm hatun meclis-i şer‘-i şerîf-i enverde zevc-i dâhili bâ‘isü hâze’l-kitâb İbrahim b. Ramazan nâm kimesne mahzarında ikrâr ve takrîr-i kelâm edip zevcim mezbûr İbrahim ile beynimizde hüsn-i zindegânemiz olmamağla zimmetinde mütekarrer ma‘kūdün-aleyh olan iki bin akçe mehr-i mü’eccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr İbrahim ile muhâlla‘a-i sahîha-i şer‘iyye ile muhâla‘a edip ol dahi ber-vech-i muharrer hul‘-ı mezbûru kabûl etdiğinden sonra hukūk-ı zevciyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 26 min-Şevvali’l-mükerrem sene 1107 Şuhûdü’l-hâl: İbrahim Beşe b. Musa, Hasan Beşe b. Mustafa, İbrahim Beşe b. Mehmed, İbrahim Çelebi b. Ahmed, İbrahim Efendi b. el-Hâc Mehmed, Mustafa Efendi b. el-müezzin, Ketenci Ali Çelebi ( ).