İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 319 Hüküm no: 222 Orijinal metin no: [71b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Efendi b. Osman’ın tasarrufunda bulunan iki adet vakıf arsayı İsmail Ağa b. Ömer’e sattığı Mahmiye-i İstanbul’da Hoca Hamza mahallesi sükkânından çardak kâtibi Ömer Efendi b. Osman nâm kimesne meclis-i şer‘-i şerîf-i enverde işbu râfi‘ü’l-kitâb el-Hâc İsmail Ağa b. el-Hâc Ömer b. el-Hâc İbrahim mahzarında ikrâr ve takrîr-i kelâm edip ferâğ-ı âtiyü’z-zikre değin taht-ı tasarrufumda olup mahalle-i mezbûrda vâki‘ bir tarafdan tarîk-i âm ve bir tarafdan el-Hâc Abdullah menzili ve bir tarafdan mezbûr el-Hâc İsmail Ağa mülkü ve bir tarafdan zevcem Fâtıma Hatun tasarrufunda olan menzil ile mahdûd tûlen ve arzen bi-hesâb-ı terbî‘i iki yüz altmış zirâ‘ arsanın yüz kırk üç zirâ‘ arsasının Payaszâde Mustafa Çelebi Vakfı’na yevmî bir akçe icâre ve yüz on yedi zirâ‘ arsasının yevmî iki akçe icâre Paşabula nâm hatun vakfına cem‘an iki yüz altmış zirâ‘ arsamı cemî‘-i müştemilâtıyla zikrolunan vakıfların mütevellîleri izin ma‘rifetiyle mezbûr el-Hâc İsmail Ağa’ya cem‘an iki yüz yirmi dört guruş bedel mukābelesinde ferâğ ve tefvîz [72a] ol dahi ber-vech-i muharrer tefevvüz ve kabûl ve bedel-i mezbûru bana bi’t-tamam def‘ u teslîm ben dahi ahz u kabz eylediğimden sonra mezbûr el-Hâc İsmail Ağa bedel-i mezkûr iki yüz yirmi dört guruşa müte‘allika âmme-i da‘vâdan benim zimmetimi ibrâ ve ıskāt edip ben dahi arsateyn-i mezbûreteyn da‘vâsından mezbûr el-Hâc İsmail Ağa’nın zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim dedikde mezbûrun kelimât-ı meşrûhasını el-mukarrun-lehu’l-mezbûr vicâhen tasdîk ve şifâhen tahkīk etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-şehr-i Şevvali’l-mükerrem li-sene seb’a ve mie ve elf. Şuhûdü’l-hâl: es-Seyyid Abdülkerim Çelebi el-Z…? el-Hâc Derviş Ağa, el-Hâc Halil Ağa …?, el-Hâc İbrahim Ağa, el-Hâc Veli el-Hamîdî, Ali Efendi tâbi‘-i Hacı Veli, el-Hâc Ali Çelebi, Ahmed Paşa ve gayruhum.