İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 321 Hüküm no: 225 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in kocası Ahmed Çelebi b. Mehmed’den anlaşarak boşandığı Mahmiye-i İstanbul’da Şeyh Ferhad mahallesi sâkinelerinden zâtı ma‘rifet-i şer‘iyye ile ârifân İmâm Hüseyin Efendi b. Kalender ve Ali Efendi b. İsmail nâm kimesneler ta‘rîfleriyle mu‘arrefe olan Hatice bt. Mehmed nâm hatun meclis-i şer‘-i şerîf-i Ahmedî’de ve mahfel-i dîn-i münîf-i Muhammedî’de zevc-i mutallakı bâ‘isü hâze’l-kitâb Ahmed Çelebi b. Mehmed nâm kimesne mahzarında ikrâr-ı tâm ve takrîr-i kelâm edip zevcim mezbûr Ahmed Çelebi târih-i kitâbda ( ) beni bâyinen tatlîk etmekle zimmetinde mütekarrer ve ma‘kūdün aleyh olan beş yüz akçe mehr-i mü’eccelimi ve nafaka-i iddet ve me’ûnet-i süknâm içün dahi bi’t-terâzî ta‘yîn olunan üç yüz akçe ki cem‘an sekiz yüz akçeyi zevcim mezbûr Ahmed Çelebi yedinden tamamen ahz u kabz edip hukūk-ı zevciyete müte‘allika âmme-i da‘vâdan mezbûr Ahmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis aşar min-şehr-i Şevvali’l-mükerrem li-sene seb‘a ve mie ve elf. Şuhûdü’l-hâl: İmâm Hüseyin Efendi b. Kalender, Ali Efendi b. İsmail, Süleyman Çelebi b. İsmail, İbrahim Çelebi b. Ahmed, Receb Çelebi b. Süleyman ve gayruhum mine’l-huzzâr.