İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 321 Hüküm no: 226 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Gabriel’in İsak v. Rafael’e olan borcunu ödemesi Yahûd tâifesinden olup mahmiye-i İstanbul’da Fener kapısı kurbünde vâki‘ işbu bâ‘isü’l-vesîka İsak v. Rafael nâm yahûdi meclis-i şer‘-i şerîf-i enverde Anaştaş v. Gabriel nâm zimmî muvâcehesinde üzerine da‘vâ ve takrîr-i kelâm [edip] mezbûr Anastaş zimmetinde cihet-i deyn-i şer‘îden yetmiş beş guruş ve bir rub‘ guruş hakkım olup meblağ-ı mezbûrun bundan akdem kırk guruşunu mezkûr Anastaş yedinden ahz u kabz edip bâkī zimmetinde otuz guruş ve bir rub‘ guruş hakkım kalmağla hâlâ suâl olunup meblağ-ı bâkī-i mezbûru dahi bana edâ ve teslîme merkūm Anastaş’a tenbih olunmak murâdımdır dedikde gıbbe’s-suâl mezbûr Anaştaş cevâbında müdde‘î-i mezbûra cihet-i mezkûreden zimmetinde bâkī ancak yirmi dört guruş ve bir rub‘ deyni olduğunu ikrâr ve i‘tirâf edip ziyâde altı guruşunu inkâr edicek müdde‘î-i mezbûreden ziyâde da‘vâsına beyyine taleb olundukda ityân-ı beyyineden izhâr-ı acziyle istihlâf etmeğin fi’l-vâki‘ müdde‘î-i mezbûre ikrârı olan yirmi dört guruş ve bir rub‘ guruşdan ziyâde cihet-i mezkûreden altı guruş deyni olmadığına mezbûr Anaştaş’a yemîn teklîf olundukda ol dahi hasbe’l-mesûl yemîn-i billâhillezî enzele’l-İncili alâ İsa aleyhisselâm etmeğin mûcebiyle ikrârı mürettebesi olan meblağ-ı mezbûr yirmi dört guruş ve bir rub‘ guruşu müdde‘î-i mezkûra edâ ve teslîme merkūm Anastaş’a ba‘de’t-tenbîh müdde‘î-i mezbûr bilâ-tenbîh ziyâde da‘vâsından [ve] bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sâbi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Ömer Çelebi b. Ahmed, Ahmed Çelebi b. Ahmed, Hüseyin Çelebi b. Mustafa.