İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 374 Hüküm no: 277 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahras Mehmed Çelebi b. Ali’nin Mustafa b. Celil’e olan borcunu taksitle ödemesi Mahmiye-i İstanbul’da Nişancı Cafer mahallesinde sâkin el-Hâc Mustafa b. Celil meclis-i şer‘-i şerîf-i enverde Ahras? Mehmed Çelebi b. Ali mahzarında ikrâr ve takrîr-i kelâm edip işbu yedimde olan hüccet-i şer‘iyye nâtık olduğu üzere zimmetinde cihet-i deyn-i şer‘îden yetmiş guruş hakkım olup ucâleten edâya iktidârı olmamağla tecîl ve taksîte tâlib olundukda ben dahi târih-i kitâbdan be her mâh ikişer guruş verip cem‘an otuz beş ay tamamına değin meblağ-ı mezbûru bana bi’t-tamam edâ ve teslîm etmek üzere taksît etdiğimde ol dahi ber-vech-i muharrer kendüye mahsûs olan işâret-i ma‘hûdesi ile taksît-i mezbûru kabûl ve merâsimini edâya ta‘ahhüd ve iltizâm eyledi dedikde tercümanları olan Ahmed b. Mehmed ve Ali b. Bali şehâdetleri ile tasdîk eylediği lede’ş-şer‘i’l-enver sâbit oldukdan sonra meblağ-ı mukassat-ı mezbûre iki guruşa Salih b. Mehmed emir ve kabûlü hâvî kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’l-yevmi’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Osman Çelebi b. Hüseyin, Mustafa Ağa b. Abdullah, Çukadar el-Hâc Ali b. Mustafa, Mustafa b. Hüseyin, İbrahim Çelebi b. Ahmed.