İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 372 Hüküm no: 276 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eş-Şeyh Mustafa Efendi Vakfı’nın mütevellîsi olan Osman Efendi b. İsmail’in vakıf menziline aynı vakfın bahçesini ilave etmesi Husûs-ı âti’z-zikrin mahâllinde ketb ve tahrîri bâbında fermân-ı âlî vârid olmağın imtisâlen-leh savb-ı şer‘-i mutahharadan keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mâr lardan Ali Halîfe b. Mustafa ile mahmiye-i İstanbul’da Hısn ebvâbında [İstanbul hısnı ebvâbından] Eğrikapı dâhilinde Tokludede mahallesinde vâki‘ merhûm eş-Şeyh Mustafa Efendi nâm sahibü’l-hayrın vakfı olup bir tarafdan İmâm Ali Efendi menzili ve iki tarafdan yine vakf-ı mezbûr ve bir tarafdan cidâr-ı hısn ile mahdûd hadîka üzerine varıp zeyl-i vesîkada muharrerü’l-esâmî [87a] Müslimîn mahzarlarında akd-i meclis-i şer‘-i şerîf eylediğinde mahalle-i mezbûrede vâki‘ merhûm ve mağfûr Hazret-i Emir Buhârî aleyhi rahmeti’l-Bârî zâviyesinde hâlâ şeyh olan zahru’s-sâlikîn bâ‘isü hâze’l-kitâb eş-Şeyh Osman Efendi b. İsmail nâm kimesne meclis-i ma‘kūd-ı mezbûrda vakf-ı mezbûra meşrûtiyet üzere bi’l-fi‘l mütevellî olup zâviye-i mezbûre mescid-i şerîfinde müezzin olan Mehmed Çelebi b. Şaban nâm sagīr hayatında umûr-ı vakf-ı mezkûru görmeye kıbel-i şer‘den kāimmakām-ı mütevellî nasb olunan es-Seyyid Ahmed Çelebi b. es-Seyyid Resül muvâcehesinde vakf-ı mezbûra ber-vech-i meşrûtiyet nâzır olan umdetü’s-sâlikîn zübdetü’l-vâsılîn es-Seyyid eş-Şeyh Fazlullah Efendi hazır olduğu hâlde takrîr-i kelâm ve bast-ı merâm edip vâkıf-ı mûmâ-ileyhin vakfiye-i ma‘mûlün-bihâsından ta‘yîn ve tasrîh olunduğu üzere mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve nevbet-i tasarrufu hâlâ bana müte‘allika işbu menzilin süknâsını vâkıf-ı mezbûr hayatda oldukca evvelâ kendi nefsine ba‘dehû zevcesi Canfeza Hatun’a ba‘dehâ evlâdına ve evlâd-ı evlâdına ve ba‘de’l-inkırâz zâviye-i mezkûrede şeyh olan kimesneye şart ve ta‘yîn ve işbu hadîka-i mezkûrede tûlen otuz iki ve arzen on yedi bi-hesâb-ı terbî‘î beş yüz kırk dört zirâ‘ hadîka menzil-i mezkûra zam ve ilhâk olunup ma‘an zabt ve tasarruf oluna deyü şart ve ta‘yîn eyleyip ve meşrûtun lehüm bi’l-külliye münkariz olup ve nevbet-i tasarruf hâlâ benim olmağın zikrolunan işbu hadîkada ber-vech-i mübeyyen beş yüz kırk dört zirâ‘ mikdârı hadîka misâha ve ifrâz ve alâmât-ı fâsıla vaz‘ olunmak matlûbumdur deyü mazmûnu takrîr-i meşrûhuna mutâbık vakfiye-i ma‘mûlün-bihâ ibrâz edip ba‘de’n-nazar kāimmakām-ı mezbûr ve nâzır-ı müşârun-ileyhden her biri istintâk olunduklarında her biri cevâblarında mazmûn-ı vakfiye-i mezbûreyi ba‘de’l-ikrâr mi‘mâr -ı mezbûr hadîka-i mezkûreyi bi’l-muvâcehe misâha ve menzil-i mezkûrun fevkānî odasının köşe direğinden doğru erik ağacına ve ondan sed duvarına ve ondan kal‘a duvarına vaz‘ olunan alâmete değin bi-hesâbı mezbûr beş yüz kırk dört zirâ‘ hadîka ifrâz ve mezbûr eş-Şeyh Osman Efendi tasarrufunda olan menzil-i mezbûra zam ve ilhâk olunup beynlerine alâmât-ı fâsıla vaz‘ olundukdan sonra vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Ali Çelebi b. Mustafa ve Mehmed Çelebi b. İbrahim ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi 25 min-Şevvali’l-mükerrem li-sene 1107 Şuhûdü’l-hâl: Ahmed Efendi b. Ali Efendi, el-Hâc Receb b. Abdullah, Ahmed Çelebi b. Abdullah, Mehmed Ağa b. Mustafa, Osman Çelebi b. Receb, va gayruhum mine’l-huzzâr.