İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 374 Hüküm no: 279 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Efendi’nin kızı Afîfe Hatun’un kendisine miras kalan emlak ve akarını Mehmed Ağa b. Hüseyin’e sattığı Mahmiye-i İstanbul’da Mimarsinan mahallesinde sâkin fahrü’l-muhadderât Afîfe Hatun bt. el-merhûm Yusuf Efendi tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân li-ebeveyn er karındaşı fahrü’l-eşbâh Ahmed Ağa ve el-Hâc Süleyman Çelebi b. Abdullah nâm kimesneler şehâdetleriyle şer‘an sâbite ve sübût-ı vekâletine hükm-i şer‘î lâhık olan Haffâf Ali Çelebi b. Abdurrahman meclis-i şer‘-i şerîf-i enverde mahmiye-i mezbûrede Karabaş mahallesinde sâkin Mehmed Ağa b. el-Hâc Hüseyin mahzarında bi’l-vekâle ikrâr-ı tâm ve takrîr-i kelâm edip müvekkilem mezbûre Afife Hatun bin yüz dört senesi Şevvali’l-mükerremi’nin on ikinci günü babası müteveffâ-yı mezbûrdan kendüye isâbet ve intikāl eden ber-vech-i âtî silk-i mülkünde münselik olan menzili ile taht-ı tasarrufunda olan vakf dükkânlarını semen-i misilleriyle âhara bey‘ ve ferâğı ve kabz-ı semene ve semeninden bazı düyûnunu edâya ve fazlasını kendüye îsâle ve kabz-ı îsâl mütevakkıf olduğu umûrun küllîsine mezbûr Mehmed Ağa’yı tarafından vekîl ve nâib-i menâb nasb u ta‘yîn etdiğinde ol dahi ber-vech-i vekâlet-i mezbûreyi ba‘de’l-kabûl bi’l-vekâle müvekkilem mezbûrenin Ayasofya Vakfı’ndan beher mâh yirmi beş akçe icâre ile taht-ı tasarrufunda olup Bezistân-ı cedîd’de vâki‘ bir dolabını yedi yüz guruş bedel mukābelesinde âhara bâ-izn-i mütevellî ferâğ ve tefvîz ve yine mahmiye-i mezbûrda Hocapaşa kurbünde Maktûl Mustafa Paşa Hanı’nda beher mâh altmış akçe icâre-i mü’eccele ile tasarrufunda olan bir bâb odayı ber-vech-i muharrer yüz on guruşa âhara ferâğ ve tefvîz ve yine Ayasofya Vakfı’ndan beher mâh yirmişer akçe ile Bezistân kurbünde vâki‘ bir bâb gazzaz dükkânına ber-vech-i muharrer iki yüz guruş bedel mukābelesinde âhara ferâğ ve tefvîz ve yine Cebecibaşı Vakfı’ndan beher mâh otuz akçe mü’ecceleli mahmiye-i mezbûrede Tüfenkhâne kurbünde vâki‘ ma‘lûmü’l-hudûd yahûdi hanesi iki yüz doksan guruşa ve yine mahrûse-i Galata’da Karaköy kapısı kurbünde merhûm Bekdâş [Bektaş] Efendi Vakfı’ndan beher mâh üç yüz altmış akçe icâre ile tasarrufunda olan ma‘lûmü’l-hudûd odalar ve dekâkin ve mahzeni beş yüz guruş bedel mukābelesinde ve yine Azepler kapısı hârici[nde] merhûm Rûznâmçeci İbrahim Efendi Vakfı’ndan beher mâh kırkar akçe icâreli bir bâb şerbetçi dükkânını kırk beş guruş bedel mukābelesinde ve yine beher mâh on beş akçe icâreli Eyyüb-i Ensârî’de olan bir bâb haffâf dükkânını ber-vech-i muharrer kırk guruş bedel mukābelesinde ve yine medîne-i Üsküdar muzâfâtından Kuzguncuk nâm karyede vâki‘ merhûm Rüstem Paşa Vakfı’na senede bin altı yüz akçe icâresi olan bostanını beş yüz elli guruş bedel mukābelesinde ve yine Hasköy’de vâki‘ kiremidhâne olan mülk hisse-i mu‘ayyenesi yüz on beş guruşa ve diğer kiremidhânede olan hissesi seksen beş guruş ve Topçular’da vâki‘ bahçe hissesini altmış guruşa bi’l-vekâle âhara ber-vech-i muharrer bey‘ u ferâğ ve temlîk ve tefvîz etdiğinden sonra bedel ve semenleri olan iki bin yedi yüz sekiz guruşu ve Abdullah Bey yedinden dahi yetmiş beş guruş ve mahmiye-i mezbûrede Yaylak kurbünde ma‘lûmü’l-hudûd mülk bir bâb menzil ve börekçi fırını ve bakkāl dükkânı semenlerinden üç yüz guruş ki min-haysü’l-mecmû‘ üç bin yüz elli guruşu ahz u kabz etdiğinden sonra makbûzu olan meblağ-ı mezkûrun târih-i kitâba gelince bin sekiz yüz kırk yedi guruşunu bi’d-defa‘ât müvekkilem mezbûreye def‘ u teslîm bâkī zimmetinde bin üç yüz sekiz guruş kalmağla târih-i kitâbdan dört gün mukaddem meblağ-ı bâkī-i mezbûru müvekkilem mezbûre mezbûr Mehmed Ağa’dan taleb ve da‘vâ etdiğinde ol dahi ber-vech-i muharrer meblağ-ı bâkī-i mezbûr bin üç yüz sekiz guruşu ve <> bi’l-vekâle ahz ve kendi mesârifine sarfla istihlâk etmekle zimmetinde deyni olduğunu huzûr-ı Müslimînde ikrâr edip edâda ta‘allül etmekle beynlerinde nizâ‘-ı küllî vukū‘ından sonra muslihûn tavassut edip müdde‘âsı olan meblağ-ı bakī-i mezbûrdan mezbûr Mehmed Ağa müvekkilem mezbûr ile bin guruş üzere sulh oldukda ol dahi sulh-ı mezbûru kabûl ve bedel-i sulh olan meblağ-ı mezbûr [88a] bin guruşu mezbûr Mehmed Ağa yedinden bi’t-tamam ahz u kabz edip ba‘de’l-yevm ziyâde müdde‘âsı olan meblağ-ı bakī-i mezbûr üç yüz sekiz guruş ve târih-i kitâba gelince ber-vech-i muharrer beynlerinde cereyân eden husûslara müte‘allika âmme-i da‘vâdan müvekkilem mezbûre mezbûr Mehmed Ağa’nın zimmetini ibrâ-yı âmm-ı kātı‘u’n-nizâ‘la ibrâ ve ıskāt edip mezbûr Mehmed Ağa dahi bedel-i sulh olmak üzere medfû‘u olan bin guruşa ve târih-i kitâba gelince beynlerinde cereyân [eden] sâir husûsa müte‘allika âmme-i da‘vâdan müvekkilem mezbûrenin zimmetini ibrâ-yı âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: Abdülhaluk Efendi b. Abdurrahman imâm-ı mahalle, Şehbazpaşazâde b. Ahmed Bey, İvaz Beşe b. Abdullah, Haydar Beşe b. Abdullah, Ömer Çelebi b. Ahmed, el-Hâc Fazlullah Çelebi b. Ahmed, İbrahim Çelebi b. Ahmed, Abdurrahman Efendi b. Mehmed Efendi, el-Hâc Salih Efendi, İbrahim Çelebi b. Mehmed.