İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 376 Hüküm no: 280 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selanik Metrepolidi Papa Ağnadiyos v. Manol’dan alacaklı olduğunu iddia eden Drako v. Kostantin’in davasını ispat edemediği Mahrûse-i Galata’ya tâbi‘ Köy nâm karye sükkânından olup Karaposa kapudanının üveyi oğlu Drako v. Kostantin nâm zimmî meclis-i şer‘-i şerîf-i enverde hâlâ Selanik Metrepolidi olan işbu râfiü’l-vesîka Papa Ağnadiyos v. Manol nâm râhip mahzarında üzerine da‘vâ ve takrîr-i kelâm edip mezbûr Ağnadiyos zimmetinde cihet-i karz-ı şer‘îden iki yüz kırk guruş hakkım olup hatta mezbûr Ağnadiyos cihet-i mezbûreden zimmetinde iki yüz kırk guruş bana deyni olduğunu alâ ruûsi’l-işhâd ikrâr ve i‘tirâf etmekle meblağ-ı mezkûru ve sâbıkā Selanik metrepolidi olan gāib ani’l-meclis Mattiyos nâm râhip zimmetinde dahi iki yüz kırk guruş hakkım olup mezbûr Mattiyos zikrolunan metrepolidlikden azl ve yerine merkūm Ağnadiyos metrepolid olmağla gāib-i mezkûrun deyni olan iki yüz kırk guruşu mezkûr Ağnadiyos’dan taleb ederim suâl olunsun dedikde müdde‘î-i mezbûrun takrîr-i meşrûhu üzere gāib-i mezbûr zimmetinde olan iki yüz kırk guruş içün vekâlet veyâ kefâleti mutazammın nesne da‘vâ etmeyip mutlak gāib-i mezbûrun yerine metrepolid olmağla deyni şer‘an edâ lâzım gelmekle gāib-i mezbûr zimmetinde olup mezbûr Ağnadiyos’dan taleb eylediği iki yüz kırk guruş içün müdde‘î-i mezbûr Drako bî-vech mu‘ârazadan ba‘de’l-men‘ kendi zimmetinde cihet-i karz-ı şer‘îden olmak üzere iddi‘â eylediği iki yüz kırk guruş içün istintâk olundukda merkūm Ağnadiyos cevâbında müdde‘î-i mezbûrun gāib-i merkūm Mattiyos zimmetinde kendi temessükü mûcebince altı yüz guruş hakkı olup meblağ-ı mezkûrun yüz yirmi guruşunu ahz u kabz edip dört yüz seksen guruş bâkī kalıp mezbûr Mattiyos’un yerine ben metrepolid olduğumda müdde‘î-i mezbûr Drako yirmi otuz nefer zimmîler ile beni kayığa koyup seni Karaposa kapudanına götürüp haps ettirip gāib-i mezkûrun deyni olan dört yüz seksen guruşu tamamen alırız yâhut cihet-i karzdan olmak üzere iki yüz kırk guruş deyn ikrâr eyle deyü beni cebr ve tahvîf etmeleriyle ben dahi cihet-i karzdan iki yüz kırk guruş deynim vardır deyü kâziben ikrâr edip işbu temessükü vermişidim vech-i muharrer üzere ikrârımda kâzibim deyücek mezkûr Ağnadiyos ikrâr-ı mezkûrunda kâzib ve kendi da‘vâ-yı meşrûhasında mubtıl olmadığına müdde‘î-i mezbûr Drako’ya bi’t-taleb yemîn teklîf olundukda yemînden nükûl etmeğin mûcebiyle mezkûr Drako meblağ-ı bâkī mezbûr iki yüz kırk guruşu dahi mutâlebesi içün bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: el-Hâc Mehmed b. İbrahim, Hammâmîzâde Mehmed Efendi, Abdurrahman Efendi, İbrahim Efendi b. ( ), İbrahim Çelebi b. Ahmed.