İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 383 Hüküm no: 286 Orijinal metin no: [90a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanos ve karısı Hori’nin miras yoluyla kendilerine intikal eden evdeki hisselerini Aritun ve Nori’ye sattıkları Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘-i mutahharadan keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi mahmiye-i İstanbul’da Şeyhferhad mahallesinde vâki‘ bir tarafdan ba‘zen Abdurrahman Odabaşı mülkü ve ba‘zen Kürkçübaşı odaları ve bir tarafdan Asvador nâm zimmî mülkü ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî Müslimîn mahzarlarında akd-i meclis-i şer‘ eyledikde menzil-i mahdûd-ı mezbûr yedinde mülkü ve hakkı olup mecmû‘ altı yüz sehim olmak i‘tibâriyle üç yüz doksan sehm-i şâyi‘inin yüz yirmi sehmini semen-i ma‘lûm-ı makbûza sadrî kebîr oğlu Aritun v. Nikefos nâm zimmîye ve altmış sehmini kezâlik sadriye kebîre kızı Nori nâm nasrâniye ve doksan sehmini dahi kezâlik dâmadı Serkiz v. Minas nâm zimmîye ve altmış sehmini dahi sadrî kebîr oğlu Avanos nâm zimmînin zevcesi Hori bt. Toros nâm nasrâniyeye bey‘ ve temlîk onlar dahi ber-vech-i muharrer ba‘de’l-iştirâ ve’t-temellük bâkī iki yüz on sehmi yedinde iken bundan akdem hâlike olan Zümrüt bt. Marat nasrâniyenin verâseti sadrî kebîr oğulları mezbûrân Aritun ve Avanos’a ve sadriye kebîre kızı mezbûre Nori’ye münhasıra ve tashîh meselesi beş sehimden olup sihâm-ı mezbûrenin ikişer sehmi mezbûrân Aritun ve Avanos’dan her birine ve bir sehmi dahi mezbûre Nori’ye ve menzil-i mezbûrdan zikri sebk eden iki yüz on sehmin seksen dörder sehmi mezbûrân Aritun ve Avanos’dan her birinin ikişer sehmine ve kırk iki sehmi dahi mezbûre Nori’nin bir sehmine isâbet eylediği şer‘an zâhir ve mütehakkık oldukdan sonra mezbûr Avanos ile zevcesi mezbûre Hori meclis-i ma‘kūd-ı mezbûrda işbu bâ‘isü’s-sifr mezbûrân Aritun ve Nori muvâcehelerinde ba‘de’t-ta‘rîfü’ş-şer‘î her biri ikrâr ve takrîr-i kelâm edip menzil-i mahdûd-ı mezbûrda olan ber-vech-i mübeyyen ırsen ve şirâen cem‘an yüz kırk dört sehim hisse-i şâyi‘adan safka-i vâhide ile mezbûrân Aritun ve Nori’ye bey‘-i bâtt-ı sahîh-i şer‘î ile beş yüz guruşa bey‘ ve temlîk onlar dahi iştirâk-i seviy üzere ber-vech-i muharrer iştirâ ve temellük ve kabûl etdiklerinden sonra semeni olan meblağ-ı mezbûr beş yüz guruşu mezbûrân Aritun ve Nori yedinden tamamen ahz u kabz eyledik ba‘de’l-yevm menzil-i mahdûd-ı mezkûrda olan cem‘an yüz kırk dört sehim hisse-i şâyi‘amız mezbûrân Aritun ve Nori’nin mülk-i müşterâları ve hakk-ı sırfları olmuştur keyfe mâ yeşâ ve yahtâr mutasarrıf olsunlar dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Yusuf b. Abdurrahman ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fî 25 Şa‘bân sene [1]107 Şuhûdü’l-hâl: Hüseyin Efendi b. Hasan, Osman Çelebi b. Ahmed, Mehmed Çelebi b. Abdülfettah, Yakup Çelebi b. Mehmed, Mehmed Çelebi b. İbrahim.