İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 381 Hüküm no: 285 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aritun v. Nikagos ile kız kardeşi Nori ve Nori’nin kocası Sergiz v. Minas’ın miras ve satın alma yoluyla müştereken kullandıkları menzile ait hisselerin taksimi Husûs-ı âti’l-beyânın mahâllinde keşf ve tahrîr ve taksîmi içün savb-ı şer‘-i münîrden bâ-fermân-ı âlî keşif nâibimiz fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mâr lardan üstâd Mustafa Halîfe b. Abdullah ve Ali Halîfe b. Abdurrahman ile mahmiye-i İstanbul’da Langa kurbünde Şeyhferhad mahallesinde vâki‘ altı yüz sehim i‘tibarıyla yüz doksan iki sehmi şirâen ve ve seksen dört sehmi ırsen Aritun v. Nikogos nâm zimmînin ve yüz otuz iki sehmi şirâen ve kırk iki sehmi ırsen li-ebeveyn kız karındaşı Nori nâm nasraniyyenin ve yüz elli sehmi şirâen mezbûre Nori’nin zevci Sergiz v. Minas nâm zimmînin mülkleri olup bir tarafdan Asvador ve bir tarafdan Aritun v. Toros nâm zimmî mülkü ve bir tarafdan ba‘zen Abdurrahman odabaşı mülkü ve ba‘zen Kürkçübaşı başı [mükerrer] odaları ve bir tarafdan tarîk-i âm ile mahdûd ulyâda iki bâb kebîr oda ve bir sofa ve bir matbah ve bir tahta-pûş ve dehliz ve bir kenîf ve vüstâda iki bâb oda ve bir sofa ve bir matbah ve dehliz ve bir kenîf ve süflâda iki bâb oda ve iki mahzen ve bir matbah ve bir kenîf ve iki su kuyusu ve iki sokak kapısını müştemil olan menzilin üzerine varıp zeyl-i kitâbda muharrerü’l-esâmî olan Müslimîn mahzarlarında akd-i meclis-i şer‘-i şerîf eyledikde mezbûr Aritun meclis-i ma‘kūd-ı mezkûrda li-ebeveyn kız karındaşı olup zâtını ma‘rifet-i şer‘iyye ile ârifân mahalle-i mezbûr ahâlîsinden Aritun v. Toros ve Asvador v. Zakar nâm zimmîler ta‘rîfleriyle mu‘arrefe olan mezbûre Nori ile zevci mezbûr Serkiz muvâcehelerinde takrîr-i kelâm ve bast ani’l-merâm edip menzil-i mezkûr vech-i meşrûh üzere mülkümüz olup kābil-i kısmet olmağla beynimizde sihâm-ı mezkûremize göre taksîm ve benim hissem bir tarafa ve kız karındaşım mezbûre Nori ile zevci merkūm Serkiz’in hisseleri bir tarafa tefrîk olunup beynleri alâmât-ı fâsıla vaz‘ ile temyîz olunmak matlûbumuzdur dedikde gıbbe’t-tasdîkı’l-mu‘teber mi‘mâr ân-ı mezbûran menzil-i mezkûru muvâcehelerinde misâha ve tahmîn eylediklerinde tûlen ve arzen bi-hesâbı terbi‘ altı yüz zirâ‘ binalı arsası olup iki yüz yetmiş altı zirâ‘ı mezbûr Aritun’un menzil-i mezkûrda olan iki yüz yetmiş altı sehm hissesine ve yüz yetmiş dört zirâ‘ kız karındaşı mezbûre Nori’nin yüz yetmiş dört sehm hissesine ve yüz elli zirâ‘ı zevci merkūm Serkiz’in yüz elli sehm hissesine isâbet eylediği şer‘an zâhir ve mukarrer oldukdan sonra menzil-i mezkûrun merkūm Aritun mülkü tarafında vâki‘ ulyâda iki sofaları bir kebîr oda ve önünde dehliz ve bir mikdâr tahta-pûş ve vüstâda bir bâb oda ve önünde bir sofa ve bir mikdâr dehliz ve süflâda bir bâb oda ve bir kebîr mahzen ve bir su kuyusu ve bir sokak kapısını müştemil olan üç yüz yirmi dört zirâ‘ binâlar [ve] arsa menzil-i mezkûrda olan cem‘an üç yüz yirmi dört sehim hisseleri için mezbûre Nori ile zevci merkūm Serkiz’e bi’t-terâzî tahsîs ve ta‘yîn ve merkūm Asvador mülkü tarafında vâki‘ ulyâda bir kebîr oda ve bir sofa ve bir matbah ve dehliz ve bir mikdâr tahta-pûş ve bir nerdübân ve bir kenîf ve vüstâda bir oda ve önünde dehliz ve bir matbah ve iki nerdübân ve bir kenîf ve süflâda bir oda ve bir mahzen ve bir matbah ve bir su kuyusu ve bir kenîf ve bir sokak kapısını müştemil olan iki yüz yetmiş altı zirâ‘ binâlı arsa menzil-i mezkûrda olan iki yüz yetmiş altı sehim hissesi için merkūm Aritun’a tahsîs ve ta‘yîn olunup ve alâmât-ı fâsıla vaz‘ ile beynleri temyîz ve tesbît olunup menzil-i mezkûru taksîmde merkūm Aritun ve kız karındaşı mezbûre Nori ile zevci merkūm Serkiz bu vech üzere terâzî ve ittifâk ve her biri hisse-i müferreze-i mu‘ayyenelerini kabûl ve kabz etmeğin [90a] vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an irsâl olunan Mehmed Çelebi b. İbrahim ve Ali b. Abdullah ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Hüseyin Efendi b. Hasan, Osman Çelebi b. Ahmed, Mehmed Çelebi b. Abdülfettah, Yakub Çelebi b. Mehmed, Mehmed Çelebi b. İbrahim, Ali Çelebi b. Abdullah.