İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 386 Hüküm no: 288 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Aci Bedros v. Kuzma v. Dodo’nun verasetinin varisleri arasında taksimiyle bir kısmının Ali b. Hasan’a satışı Vilâyet-i Anadolu’da İncesu kasabası ahâlîsinden olup medîne-i Ankara’ya giderken esnâ-i tarîkde bundan akdem hâlik olan Aci Bedros v. Kozma v. Dodo nâm zimmînin verâseti zevce-i metrûkesi Vasilye bt. Sava nâm nasrâniye ile sulbî kebîr oğulları Avrail Keşiş ve Çergis ve hîn-i helâkında sagīrler olup hâlâ kebîr olan oğulları Peredemoz ve Baryam’a ve sulbiye kebîre kızı İne nâm nasrâniyeye münhasır olup kable’l-kısme mezbûr Baryam dahi hâlik olup verâseti anası mezbûre Vasilye ile li-ebeveyn er karındaşı merkūm Biredemoz’a münhasıra ve tashih meseleleri bi tarîkı’l-münâsahati’ş-şer‘iyye iki yüz on altı sehimden olup sihâm-ı mezbûreden otuz dört sehmi merkūme Vasilye’ye ve kırk ikişer sehmi mezbûrân Avrail Keşiş ve Çergis’den her birine ve yirmi bir sehmi mezbûre İne’ye ve yetmiş yedi sehmi mezbûr Biredemoz’a isâbet eylediği şer‘an zâhir ve müte‘ayyen oldukdan sonra mezbûr Biredemoz asâleten ve mezbûretân Vasilipe ve İne taraflarından husûs-ı âti’z-zikre vekîl olduğu zâtlarını ma‘rifet-i şer‘iyye ile ârifân kasaba-i mezbûre ahâlîsinden Hüseyin b. el-Hâc Osman ve Hüseyin Halîfe b. Halil şehâdetleriyle şer‘an sâbit olan Hıdır v. Kosta nâm zimmî vekâleten meclis-i şer‘-i şerîf-i enverde işbu râfi‘ü’l-kitâb el-Hâc Ali b. el-Hâc Hasan [91a] mahzarında her biri ikrâr-ı tâm ve takrîr-i kelâm edip arsasının merhûm İbrahim Çavuş Vakfı’na senede beş yüz kırk akçe mukāta‘ası olup ebniye-i mevcûdesi mülk-i sırf olan mahmiye-i İstanbul’da Davudpaşa iskelesi kurbünde Kasap İlyas mahallesinde vâki‘ bir tarafdan el-Hâc Ali dükkânı ve iki tarafdan Küçük Langa bostanı ve bir tarafdan tarîk-i âm ile mahdûd yağhâne ebniyesinin ve içinde mevcûd iki şîrugan değirmeni ve iki bezir değirmeni ve bir mengene ve bir kadırga ve iki fırın ve iki kazgan ve biri tahtadan mebnî ve biri zîr-i zemîn iki mahzen ve sekiz küplerin nısf-ı şâyi‘leri hâlik-i mezbûr Aci Bedros’un ile’l-helâk mülk ve hakkı olup ba‘de’l-helâk münâsaha-i merkūme üzere veresesi mezbûrûna ırsen isâbet etmiş iken mezbûr el-Hâc Ali zikrolunan nısf hissenin mecmû‘una vâzı‘u’l-yed olmağla târih-i kitâbdan iki ay zikrolunan nısf hisseyi mezbûr el-Hâc Ali’den hâkim-i muvakkı‘-ı sadr-ı küttâb tûba lehû ve hüsne me’âb hazretleri huzûrunda taleb ve da‘vâ eylediğimizde ol dahi cevâbında hâlik-i mezbûr Eci Bedros’un iki yüz guruş deyn-i müsbeti olup nukūd ve menkūl terekesi olmayıp deyn-i mezbûru edâ içün zikrolunan nısf hissenin bey‘i lâzım gelmekle mezbûr Avrail Keşiş bin doksan sekiz senesi şehr-i Rebî‘ülevveli evâhirinde kasaba-i mezbûrede nâibü’ş-şer‘ olan Süleyman Efendi huzûrunda kendi tarafından asîl ve mezbûre [Pere]demoz ile merkūm Baryam sagīrler olup vasîleri olmağla vesâyeten ve mezbûretân Vasilye ve İne asâleten zikrolunan nısf hissede olan hisse-i merkūmelerini deyn-i mezbûru edâ içün merkūm Çergis’e iki yüz guruşa her biri asâleten ve vesâyeten bey‘ ol dahi ba‘de’l-iştirâ def‘ olunmuş zikrolunan nısf hissenin mecmû‘u ırsen ve şirâen mülk ve hakkı oldukdan sonra mezbûr Çergis dahi zikrolunan nısf hisseyi Üsküdarlı Mehmed Ağa’ya üç yüz seksen guruşa bey‘ u teslîm ol dahi ba‘de’l-iştirâ ve’t-tesellüm üç yüz elli guruş semen-i makbûza bana bey‘ u teslîm ben dahi iştirâ ve tesellüm etmişidim deyü da‘vâyı def‘ edip lâkin def‘-i mezbûrunu isbât edememekle ba‘de’t-tahlîf zikrolunan nısf hisseyi bize teslîme hükm-i hâkimü’ş-şer‘ lâhık olmuşidi hâlâ mezbûr Biredemoz emlâk-i mezbûrenin nısf-ı şâyi‘inde olan iki yüz on altı sehimden hisse-i irsiyem olan yetmiş yedi sehim hisse-i şer‘iyyemi bi cümleti’t-tevâbi‘ ve’l-levâhık mezbûr el-Hâc Ali’ye yüz on beş guruşa bey‘ ve temlîk ve teslîm edip ol dahi iştirâ ve kabûl ve temellük ve tesellüm eyledikden sonra semen-i mezbûr yüz on beş guruşu yedinden tamamen ahz u kabz eyledim ve vekîl-i mezbûr Hıdır dahi müvekkilelerim mezbûretân Vaslipe ve Eyne’nin kezâlik emlâk-i mezbûrda olan cem‘an elli beş sehim hisse-i şer‘iyyelerini yine mezbûr el-Hâc Ali’ye kırk guruşa bey‘ ve temlîk ve teslîm ol dahi ba‘de’l-iştirâ ve’t-tesellüm semen-i mezbûr kırk guruşu yedinden bi’l-vekâle ahz u kabz ve tesellüm eyledim fî-mâ ba‘d zikrolunan yağhâne ebniyesi ve âlât-ı mezkûrenin nısf-ı şâyi‘lerinde benim ve müvekkiletân-ı mezbûretânın hisseleri olan cem‘an yüz otuz iki sehim hisse-i şâyi‘amız mezbûr el-Hâc Ali’nin mülk-i müşterâsı olmuştur keyfe mâ yeşâ ve yahtâr mutasarrıf olsun dediklerinde mukırrân-ı mezbûrânın vech-i meşrûh üzere asâleten ve vekâleten cârî ve sâdır olan cemî‘-i kelîmâtını el mukırrûn lehu’l-mezbûr el-Hâc Ali vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu.. Fi’l-yevmi’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: el-Hâc Ahmed b. el-Hâc Hasan, Mustafa b. Abdullah, Abdülkadir b. Ahmed, Nalband Musa b. Mehmed, Attar Abdullah b. Mustafa, Mustafa Beşe b. Veli …?, es-Seyyid İbrahim b. es-Seyyid Mustafa, Yiğitbaşı Reis b. İbrahim, Halil Çelebi b. ( ), Hüseyin Efendi b. ( ), el-Hâc Osman b. ( ), el-Hâc Halil b. Mehmed, Mehmed Efendi b. Hüseyin, İbrahim Çelebi b. Ahmed, Ali Beşe b. ( ).