İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 387 Hüküm no: 289 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi b. Abdüllatif’in İbrahim b. Ahmed’e olan borcunu ödemesi Mahmiye-i İstanbul’da Edirnekapısı kurbünde Ali Paşa-yı atîk mahallesi sükkânından işbu râfi‘ü’l-kitâb İbrahim b. Ahmed dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde mahmiye-i mezbûrede Nahılbend mahallesi sükkânından Ahmed Efendi b. Abdüllatif mahzarında üzerine da‘vâ ve takrîr-i kelâm edip târih-i kitâbdan üç sene mukaddem ben ve merkūm Ahmed Efendi vilâyet-i Rumeli’nde medîne-i Yenişehir’de olduğumuz hâlde medîne-i mezbûreden mahmiye-i merkūmeye getirip ceddem Ümmühani Hatun’a teslîm etmek içün kendi malımdan mezbûr Ahmed Efendi’ye otuz guruşumu bi tarîkı’l-emâne def‘ u teslîm ol dahi ahz u kabz eyledikden sonra [91b] getirip ber-vech-i muharrer teslîm etmeyip kendi mesârifine sarfla istihlâk etmekle târih-i kitâbdan bir sene mukaddem meblağ-ı mezbûr otuz guruşu mezbûr Ahmed Efendi’den bi tarîkı’d-damân taleb eylediğimde meblağ-ı mezbûru yedimden ba‘de’l-kabz kendi mesârifine sarfla istihlâk etmekle zimmetinde bana edâsı lâzım deyni olduğunu ikrâr ve i‘tirâf edip deyn-i mezbûru nâtık ve hatt u hatmini hâvî işbu temessük[ü] dahi vermişiken hâlâ taleb eylediğimde bana edâdan imtinâ eder suâl olunup alıverilmesi matlûbumdur dedikde gıbbe’s-suâl mezbûr Ahmed Efendi cevâbında fi’l-hakīka kazıyye bâlâda tafsîl ve beyân olunan vech üzere olup müdde‘î-i mezbûr İbrahim’den meblağ-ı merkūm otuz guruşu ahz u kabz eylediğimden sonra mezbûre Ümmühani’ye teslîm etmeyip kendi mesârıfıma sarfla istihlâk eyledim hâlâ meblağ-ı mezbûr otuz guruşu cihet-i mezbûreden müdde‘î-i mezbûr İbrahim zimmetinde lâzımü’l-edâ deynimdir deyü tav‘an ikrâr ve i‘tirâf etmeğin alâ mûcib-i i‘tirâfihî meblağ-ı mezbûr otuz guruşu müdde‘î-i mezbûra edâya merkūm Ahmed Efendi’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Şevvali’l-mükerrem li-sene [1]107 Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-emâcid ve’l-ekârim Mehmed Ağa ser-çavuşân, fahrü’l-akrân ve’l-ekfâ Mustafa Ağa, el-Hâc Halil Efendi b. Mehmed, Ali Beşe Çukadar, Mehmed Ağa ser-muhzırân, Mehmed Efendi b. Hüseyin.