İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 518 Hüküm no: 401 Orijinal metin no: [127a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzlar v. Tatus’un, mûrisi Mihal v. Kostantin’in ölümünden önce Seferinos’a emanet bıraktığını iddia ettiği mücevherler hakkındaki davasının reddilmesi Fi’l-asl vilâyet-i Trabzon kazâsına tâbi‘ Araklı nâm karye ahâlîsinden olup Mısr-ı Kāhire’de ticâret üzere sâkin iken bundan akdem hâlik olan Mihal v. Kostantin v. Lefter nâm zimmînin li-ebeveyn er karındaşı oğlu ve min-ciheti’l-usûbeti’n-nesebiye hasran vârisi olan Kuzlar v. Tatos nâm zimmî meclis-i şer‘-i şerîf-i enverde mahmiye-i İstanbul hısnı ebvâbından [127b] Balatkapısı hâricinde vâki‘ Tûr-ı Sînâ râhiblerine mahsûs manastırda misâfiren sâkine işbu sahibi’l-vesîka Seferinos v. Yani nâm râhib muvâcehesinde üzerine da‘vâ ve takrîr-i kelâm edip târih-i kitâbdan kırk dört ay mukaddem mezbûr Seferinos manastır-ı merkūmda Ogonos ta‘bîr olunur sâir râhiblerin nâzırı iken mûrisimiz mezbûr Mihal yedinde mülk-i vaz‘ı olan bir sepet sandığı içinde mevcûd bin iki yüz yedi aded yaldız altını ve iki bin dirhem hâlisü’l-ayâr sîm ve her miskāli sekizer kuruş kıymetli yüz elli miskāl inci ve dört yüz kuruş kıymetli mahlût altınını mezbûr Seferinos’a bi-tarîkı’l-emâne def‘ u teslîm ol dahi ahz u kabz ve kendi mesârifine sarfen istihlâk eyledikden sonra kable’l-ahz mezbûrun zimmetinde iken mevrûsum merkūm Mihal hâlik olup bi’l-irsi’ş-şer‘î ancak bana isâbet ve intikāl etmişdir. Hâlen suâl olunup zikrolunan altın ve sîmin mislini mârrü’z-zikr incinin kıymet-i şer‘iyesini bana red ü teslîme mezbûr Seferinos’a tenbîh olunmak matlûbumdur dedikde gıbbe’s-suâl mezbûr Seferinos husûs-ı mezbûru bi’l-külliye inkâr etmekle müdde‘î-i mezbûrdan müdde‘âsına mutâbıka beyyine taleb olundukda ityân-ı beyyine için izhâr-ı acziyle istihlâf etmeğin fi’l-hakīka müdde‘î-i mezbûrun mevrûsu mezkûr Mihal’den hayatında bin iki yüz yedi aded yaldız altını ve iki bin dirhem hâlisü’l-ayar sîm ve her miskāli sekizer kuruş kıymetli yüz elli miskāl inci ve dört yüz kuruş kıymetli mahlût altını bi-tarîkı’l-emânet ahz u kabz ve istihlâk etmeyip ol vechile zikrolunan altınların ve sîmin misilleri ile mârrü’z-zikr incinin kıymet-i şer‘iyyesinin bi tarîkı’d-damân edâsı üzerine lâzım geldiğine mezbûr Seferinos’a yemîn teklîf olundukda ol dahi hasbe’l-mesûl yemîn billâhi’l-lezî enzele’l-incîle alâ İsa aleyhisselâm etmeğin mûcebiyle müdde‘î-i mezbûr bilâ-tenbîh bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min-Zilhicceti’ş-şerîfe li-sene seb‘a ve mie ve elf. Şuhûdü’l-hâl: Fahrü’l-müderrisîni’l-kirâm İbrahim Efendi b. Halil Paşa, Umdetü’l-müderrisîni’l-fihâm Kebîrîzâde Yahya Efendi, Hüseyin Beşe b. Ahmed el-mübâşir, Mustafa Çelebi b. Halil tâbi‘-i İbrahim Efendi, Ahmed Efendi b. Mehmed kâtib-i kassâm, Mahmud Efendi b. ( ), Murteza Efendi b. ( ), Mehmed Çelebi b. İbrahim, Yiğitbaşı Mustafa Çelebi, Ahmed Çelebi b. Ahmed.