İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 519 Hüküm no: 402 Orijinal metin no: [127b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzlar v. Tatus’un, mûrisi Mihal v. Kostantin’in ölümünden önce emanet bıraktığını iddia ettiği mücevherat hakkında Seferinos vesairleri aleyhindeki davasının reddilmesi Fi’l-asl vilâyet-i Anadolu’da Trabzon kazâsına tâbi‘ Araklı nâm karye ahâlîsinden olup ticâret vechi üzere mahrûse-i Mısr-ı Kāhire’de bundan akdem hâlik olan Mihal v. Kostantin v. Lefter nâm zimmînin li-ebeveyn er karındaşı oğlu ve min-ciheti’l-usûbeti’n-nesebiye hasran vârisi olan Kuzlar v. Tatos nâm zimmî meclis-i şer‘-i şerîf-i enverde mahmiye-i İstanbul hısnı ebvâbından Balatkapısı hâricinde vâki‘ Tûr-ı Sînâ râhiblerine mahsûs manastırda sâkin olan Yuvanikyos v. Petro ve Kirilos v. Roytem ve Papa Kozma v. Yani nâm ruhbân muvâcehelerinde üzerlerine da‘vâ ve takrîr-i kelâm edip târih-i kitâbdan kırk dört ay mukaddem mûrisim hâlik-i mezbûr Mihal hâl-i hayatında manastır-ı merkūmda Ogomnos ta‘bîr olunur râhiblerin nâzırı olan işbu hazır bi’l-meclis Seferinos v. Yani nâm râhib yedinde mülk ve hakkı olan bir sepet sandığı içinde mevcûd bin iki yüz yedi aded yaldız altını ve iki bin dirhem hâlisü’l-ayar sîm ve her miskāli sekizer kuruş kıymetli mahlût altınını bi-tarîkı’l-emâne def‘ u teslîm ol dahi ahz u kabz ve kendi mesârifine sarfla istihlâk eyledikden sonra kable’l-ahz mezbûr Seferinos zimmetinde iken mûrisim mezkûr Mihal hâlik olmağla zikrolunan altınlar ve sîm ve incinin kıymet-i şer‘iyyesi ırsen bana isâbet ve intikāl etmekle târih-i kitâbdan üç gün mukaddem hâkim-i muvakki‘-i sadr-ı kitâb tûbâ lehü ve hüsn-i meâb hazretleri huzûrlarında zikrolunan altınlar ve sîmin misilleri ile mârrü’z-zikr incinin kıymet-i şer‘iyyesini mezbûr Seferinos’dan taleb ve da‘vâ eylediğimde ol dahi inkâr etmekle ben dahi müdde‘âmı isbât edemeyip mezbûr Seferinos bi’t-taleb tahlîf-i şer‘î ile tahlif olunup ben bilâ-beyyine bî-vech mu‘ârazadan men‘ [128a] olunmuş idim. Lâkin zikrolunan altınlar ile sîm ve inciler mûrisim mezbûrdan mezkûr Seferinos ba‘de’l-kabz işbu merkūmûn Yuvanikyos ve Kirilos ve Papa Kozma beynlerinde iktisâm ve her biri ahz u kabz ve kendiler ekl ve bel‘ etmişlerdir. Hâlen mezbûrûndan taleb ederim. Suâl olunsun dedikde müdde‘î-i mezbûrun takrîr-i meşrûhu üzere zikrolunan altınlar ve inciyi sen ahz u kabz ve kendi mesârifine sarfla istihlâk eyledin deyü mezbûr Seferinos’dan ba‘de’d-da‘vâ zikrolunan altın ve sîm ve inciyi siz ahz u kabz ve kendiniz ekl ü bel‘ eylediniz deyü tekrar mezbûrûndan taleb meşrû‘ olmayıp da‘vâsı lağv-ı mahz olmakla, mezbûrûn Yuvanitos ve Kirilos ve Papa Kozma’ya suâl dahi teveccüh etmeyip müdde‘î-i merkūm Mihal bî-vech mu‘ârazadan men‘ olunup mâ-vaka‘a bi’t-taleb ketb olundu. Fî 26 Zilhicce sene [1]107 Şuhûdü’l-hâl: Ahmed Efendi b. Mehmed, Mahmud Efendi b. Mehmed, Murteza Efendi b. Ali, el-Hâc İsmail sâkin-i Valide Hanı, Mehmed Çavuş arzuhâlci, Ahmed Çelebi b. Mehmed, Abdurrahman b. Abdullah, Muhtesib Mustafa Ağa, Mehmed Ağa Ça[r]dakcı? çorbacısı, el-Hâc Mehmed Efendi b. İbrahim.