İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 544 Hüküm no: 418 Orijinal metin no: [136a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anadolu ve Rumeli’den gelen sığırların Yahudi kasapları tarafından yollarda yüksek fiyatla satın alınmasına mani olunacağı Mu‘ârazadan men‘ Mahmiye-i İstanbul’da sığır kassâbları kethudâsı olan Elhâc Süleyman b. Ahmed nâm kimesne meclis-i şer‘-i şerîfde mahmiye-i mezbûrede Balatkapısı hâricinde tâife-i Yahûd’un sığır kassâbları olan Mosi v. Yako ve Yeşuva v. v. [mükerrer yazılmıştır.]? Polmari ve Havâss-ı Aliyye kazâsı muzâfâtından kasaba-i Hasköy’de sığır kassâbı olan Avraham v. İşa nâm yahûdiler muvâcehelerinde takrîr-i da‘vâ ve tasdîr-i müdde‘â edip Anadolu ve Rumeli’nde sürücüler ile mahmiye-i mezbûreye gelen sığır Yedikule hâricinde vâki‘ Tokat’a dâhil oldukda Tokat kethudâsı ma‘rifetiyle tevzî‘ olunup her yüz sığırda on beş sığır Yahûd kassâblarına tevzî‘ olunurken mezbûrûn Yahûd kassâbları Anadolu ve Rumeli’nde sürücüler ile gelen sığırı karşılayıp Tokat’a dâhil olmadan ziyâde bahâ ile iştirâ ve kendi beynlerinde bey‘ etmeleriyle zahîreyi izâ‘at eyledikleri ecilden ba‘de’l-yevm ber-vech-i muharrer Anadolu ve Rumeli’nde sürücüler ile gelen sığırları Tokat’a dâhil olmadan yollarda karşılayıp iştirâ ve zebh etmemek üzre bin yüz dört senesi Şevvali’l-mükerreminde her biri kavl ü ittifâk edip bu vech üzre taraf-ı şer‘den yedimize hüccet-i şer‘iye verilip ve hüccet-i muzbûre mûcebince Anadolu ve Rumeli’nde sürücüler ile gelen yollarda karşılayıp Tokat’a dâhil olmadan ziyâde bahâ ile celeb-keşân tâifesinden hufyeten sığır iştirâ etdirilmeyip ve edenlere ta‘zîr ve tecrîm etdirilmek bâbında bin yüz yedi senesi şehr-i Rebî‘ülâhirinin yirmiüçüncü günü yedime emr-i şerîf-i âlîşân dahi ihsân olunmuşiken ber-vech-i meşrûh Anadolu ve Rumeli’nde sürücüler ile Tokat’a sığır geldiği eyyâmda tâife-i mezbûre kassâbları etrâfta olan kurâ ve kasabâta çıkıp buldukları mahâlde akçeleriyle beşer ve altışar sığır iştirâ ve yedimizde fermân-ı şerîfimiz vardır deyü zebh ve bey‘ ederler hâlâ suâl olunup ber-vech-i muharrer kurâ ve kasabâttan beşer ve altışar sığır iştirâsından dahi men‘ olunmak matlûbumuzdur deyü her biri zikrolunan târihler ile muvarraha bir kıt‘a hüccet ve bir kıt‘a emr-i şerîf-i âlîşân ibrâz edip feth ve kırâet olundukda mazmûn-ı münîfleri müdde‘î-i mezbûrun takrîr-i meşrûhu üzre ancak Anadolu ve Rumeli’nde sürücüler ile gelen sığırları yollarda karşılayıp Tokat’a dâhil olmadan iştirâdan men‘ olunduklarını nâtık bulunmağın gıbbe’s-suâl mezbûrûn Mosi ve Yeşuva ve Avraham cevâblarında fi’l-hakīka kazıyye vech-i muharrer üzre olup taşradan sürücüler ile gelen sığırlar Tokat’a dâhil omadıkça yollarda karşılayıp celeb-keşândan iştirâ memnû‘ olup lâkin Tokat’a sığır gelmediği eyyâmda kifâf-ı nefsimiz için etrâfta olan kurâ ve kasabâttan bulduğumuz yerlerde akçemiz ile beşer ve altışar sığır iştirâ etmek kānûn-ı kadîm olup hatta mukaddemâ Tokat kethudâsı husûs-ı mezbûra bî-vech dahleylediğine rikâb-ı hümâyûna arz eylediğimizde Anadolu Kādıaskeri olup vedâ‘-ı âlem-i fânî eden merhûm İbrahim Efendi’ye havâle olundukda Yedikule hâricinde vâki‘ Tokat’a gelip İstanbul ve Galata ve Üsküdar ve Eyüb kassâblarına tevzî‘ olunan sığırların on beş sığır Yahûdî kassâblarına verilmek defter-i cedîdde mukayyeddir ve iddi‘âyı suâl eyledikde fi’l-vâki‘ Yahûd kassâbları etrâfa çıkıp buldukları yerde beşer altışar sığır alıp tâifelerine bey‘ edegelmişlerdir deyü sığır kassâbları kethudâsının haber verdiğin müşârün-ileyh İbrahim Efendi arz etmeğin arz olunduğu üzre tâife-i Yahûd bulundukları yerde akçeleriyle beşer ve altışar sığır iştirâ eyledikleri husûsunda müşârün-ileyhin arzı mûcebince amel olunup min-ba‘d kadîmden olagelene muhâlif nizâ‘ etdirilmemek bâbında bindoksansekiz senesi Şevvali’l-mükerreminde yedimize işbu emr-i şerîf-i cihân-mutâ‘ ihsân olunmuştur deyü mazmûnu min-külli’l-vücûh takrîr-i meşrûhlarına muvâfık bir kıt‘a fermân-ı âlî ibrâz etmeleriyle müdde‘î-i mezbûr muvâcehesinde feth ve kırâet ve istintâk olundukda kethudâ-i mezbûr dahi fi’l-vâki‘ Tokat’a sığır gelmediği eyyâmda tâife-i Yahûd kassâbları etrâfa çıkıp buldukları yerlerden beşer ve altışar sığır alıp tâifelerine bey‘ eylediklerini tâyi‘an ikrâr ve i‘tirâf etmeğin mûcebince taşradan sürücüler ile celeb-keşân tâifesinin getirdikleri sığırları Tokat’a dâhil olmadan yollarda karşılayıp ziyâde bahâ ile iştirâ etmemek üzre mezbûrûn Yahûd kassâblarına tenbîh ve kadîmden olageldiği vech üzre [136b] kifâf-ı nefsleri’çün etrâfdan beşer ve altışar sığır iştirâlarına bî-vech mu‘ârazadan kethudâ-i mezbûr men‘ birle mâ vaka‘a bi’t-taleb ketb olundu. Fî gurre-i Muharremi’l-harâm sene [1]108 Şuhûdü’l-hâl: Mustafa Çelebi b. Elhâc Ahmed, İbrahim Çelebi b. Ahmed, Mustafa Çelebi b. Mehmed Yiğidbaşı, Mustafa Çelebi b. Şaban, Ali Çelebi b. Bali, Ahmed Çelebi b. Osman.