İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 547 Hüküm no: 420 Orijinal metin no: [137a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Abdullah’ın tasarrufunda olan menzil hissesini İsmail Ağa’ya ferağ ettiği İbra Mahmiye-i İstanbul’da Hocahamza mahallesi sâkinelerinden olup zât[ı] ma‘rifet-i şer‘iye ile ârifân umdetü’l-müderrisîni’l-kirâm Mustafa Efendi b. Ali ve Mehmed Çavuş b. Abdurrahman ta‘rîfleriyle mu‘arrefe olan Fâtıma Hatun bt. Abdullah meclis-i şer‘-i şerîf-i enverde mahalle-i mezbûre sükkânından işbu râfi‘u’l-kitâb tüccârdan Elhâc İsmail Ağa b. Elhâc Hamza mahzarında takrîr-i kelâm edip, mahalle-i mezbûrede vâki‘ bir tarafdan İbrahim Ağa bahçesi ve iki tarafdan mezbûr Elhâc İsmail Ağa tasarrufunda olan bahçe ve bir tarafı tarîk-i âmla mahdûd ulyâda üç bâb oda ve bir sofa ve bir dehliz ve bir kenîf ve vüstâda bir oda ve bir sofa ve dehliz ve tahtânî bir kârgir mahzen ve matbah ve mağsel ve bir miktar suyu müştemil menzil merhûm Hocahamza Vakfı mülhakātından Başabula? nâm sahibetü’l-hayr vakfından icâre-i mu‘accele ve beher mâh on beş akçe ücret-i müeccele ile taht-ı tasarrufumda olup ve menzil-i mezbûrun bahçesi olup [bir] tarafında vâki‘ merhûm Papazzâde Mustafa Çelebi Vakfı’ndan icâre-i mu‘accele ve beher mâh otuzar akçe ücret-i müeccele ile zevcim işbu hazır bi’l-meclis Ömer Efendi b. Hamza’nın taht-ı tasarrufunda iken mezbûr Ömer Efendi bahçe-i mezbûre arsasını merkūm Elhâc İsmail Ağa’ya bâ-izn-i mütevellî bedel-i ma‘lûm mukābelesinde ferâğ ve tefvîz etmişidi hâlâ ben dahi menzil-i mahdûd-ı mezbûru bi-cümleti’t-tevâbi‘ ve’l-levâhık ve mezbûr İsmail Ağa’ya sekiz yüz kuruş bedel mukābelesinde vakf-ı mezbûrun kāimmakām-ı mütevellîsi olan işbu hazır bi’l-meclis Mustafa Çelebi’nin izn ve ma‘rifetiyle ferâğ ve tefvîz ol dahi tefevvüz ve kabûl ve bedel-i ferâğ olan meblağ-ı merkūm sekiz yüz kuruşu işbu meclisde yedinden ahz u kabz edip fîmâ-ba‘d menzil-i mahdûd-ı merkūm Elhâc İsmail Ağa’nın dâhil-i havza-i tasarrufu olmuşdur benim asla alâka ve medhalim kalmadı menzil-i mezbûra ve bedeline ve bi’l-cümle târih-i kitâba gelince beynimizde cereyân eden sâir ahz u i‘tâ mu‘âmelâtı şettâya müte‘allika âmme-i da‘vâdan mezbûr Elhâc İsmail Ağa’nın zimmetini ol dahi benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mezbûr Ömer Efendi dahi meclis-i şer‘den mezbûr Elhâc İsmail Ağa mahzarında ikrâr ve i‘tirâf edip zikrolunan bahçe arsasını mezbûr Elhâc İsmail Ağa’ya takdîr? ve bedel-i mislinden noksan-ı fâhiş ile ferâğ ve tefvîz etmişidim deyü da‘vâya mutesâddî oldum el-hâletü hâzihî da‘vâ-yı mezbûremden fâriğ olup husûs-ı mezbûr ve bi’l-cümle târih-i kitâba gelince beynimizde cereyân eden ahz u i‘tâ ve hukūk-ı ma‘lûme ve mechûle müte‘allika âmme-i da‘vâdan hakk-ı mezbûr Elhâc İsmail Ağa’nın ol dahi benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî 24 Zilhicce sene [1]107 Şuhûdü’l-hâl: Elhâc Derviş Ağa, Elhâc Osman b. Mustafa, Elhâc Mustafa b. İsmail, Ahmed Beşe b. Mehmed, Elhâc İbrahim Ağa b. el-Hâc Veli el-Hamîdî, Mehmed Ağa b. Mustafa, Elhâc Hasan Ağa ?, Elhâc Hüseyin [b.] Mustafa, Elhâc Receb b. Abdurrahîm, , Hicâzî Çelebi b. Yahya, es-Seyyid Mustafa b. Mehmed, Ali Efendi b. Abdurrahman, Mustafa Efendi el-imâm.