İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 637 Hüküm no: 490 Orijinal metin no: [164b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. eş-Şeyh Mustafa Efendi Vakfı’na ait yıkılmaya yüz tutmuş eve tahminen fiyat biçildiği Husûs-ı âti’l-beyânın mahâllinde ketb ü tahrîri bâbında fermân-ı âlî vârid olmağın imtisâlen lehû sabv-ı şer‘-i enverden keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlarından Dede Mehmed Halîfe b. İshak ve Mustafa Halîfe b. Abdullah ile mahmiye-i İstanbul’da Toklu Dede mahallesinde vâki‘ merhûm eş-Şeyh Mustafa Efendi Vakfı müsakkafâtından olup bir tarafdan mahalle-i mezbûre imâmı Ali Efendi menzili ve bir tarafdan kal‘a duvarı ve bir tarafdan yine vakf-ı mezbûrdan olup gallesi vücûh-ı hayrâta mevkūfe menzil ve bir tarafı tarîk-i âm ile mahdûd olan bî-garaz Müslimîn mahzarında akd-i meclis-i şer‘-i nebevî eylediğinde menzil-i mahdûd-ı mezkûra icâreteyn-i ma‘lûmeteyn ile mutasarrıf olan işbu râfi‘u’l-kitâb umdetü’l-meşâyih eş-Şeyh Yahya Efendi b. eş-Şeyh Şaban Efendi meclis-i ma‘kūd-ı mezkûrda vakf-ı mezbûra kāimmakāmı mütevellî olan es-Seyyid Ahmed Çelebi b. Ömer muvâcehesinde takrîr-i kelâm ve ta‘bîr ani’l-merâm edip işbu menzil-i mahdûd-ı mezkûr ber-vech-i muharrer icâreteyn-i ma‘lûmeteyn ile taht-ı tasarrufumda olup müşrif-i harâb olmağla kābil-i süknâ olmayıp vakıfda dahi müceddeden binâya müsâ‘ade olmamağla kendi malımla ihdâs eyleyeceğim ebniye mülküm olmak üzere mezbûr es-Seyyid Ahmed Çelebi’ye izin vermekle nazar olunup hükm-i enkāzda olan ebniyesi keşf ve mesâha ve tahmîn-i sahîh ile tahmîn ve takvîm olunmak matlûbumdur dedikde ba‘de’n-nazar hâl minvâl-i meşrûh üzere olduğu zâhir ve nümâyân oldukdan sonra mi‘mârân-ı mezbûrân menzil-i mahdûd-ı mezkûrun hükm-i enkāzda olan ebniyesini keşf ve mesâha ve tahmîn-i sahîh ile tahmîn ve takvîm eylediklerinde tûlen ve arzen bi-hesâb-ı terbî‘î altmış beş zirâ‘ bir bâb fevkānî odadan ve bir sofa ve bir dehliz sakf ve tavanlarının beher zirâ‘ı kırk akçeden iki bin altı yüz seksen akçe olup ziyâdeye tahammül olmadığını mi‘mârân-ı mezbûrân ile Müslimîn-i mezkûrîn icmâ‘ ve ittifâk edip her biri haber vermeğin vâki‘ hâli mevlânâ-yı mezbûr mahâllinde ketb ü tahrîr edip ba‘dehû ma‘an ba‘s olunan Mehmed Çelebi b. İbrahim ve Yusuf b. Abdurrahim ile meclis-i şer‘e gelip alâ vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 23 mine’l-Muharremi’l-harâm sene [1]108. Şuhûdü’l-hâl: Ali Efendi b. Mehmed, Mehmed Efendi b. Ömer, es-Seyyid Osman Efendi b. İsmail, Ali Ağa b. Ahmed, el-Hâc Osman b. ( ), Ahmed Efendi b. Ali el-imâm, Ahmed Çelebi b. Mehmed, Abdülgani b. Hüseyin, Ömer Efendi İmâm-ı Nişânî İntehe’s-sicil fî hâze’l-mahâl ve’llezî nettahize bi adedi mâ bakıye mine’s-sicilli fi’d-def‘ati’l-ûlâ hurrire fîhi zübdetü’l-fakīr bi’l-fakīr ile’llâhi’l-kadîr Abdullah b. Mustafa el-kādî bi-medîne-i Kostantıniyye el-mahmiye intihâ fi’l-yevmi’l-hâmis ve’l-ışrîn min-Saferü’l-hayr li seneti seman ve mieti ve elf. [Kayıtlar Kādı Abdullah b. Mustafa’nın dönemine ait olan kayıtlar burada bitmiş olup bundan sonraki kayıtlar bu defterin sonundan başlayarak bu varağa kadar gelmiştir. Bundan sonraki sayfalarda iki varak numarası vardır. Transkribsiyon esnasında Varak numarası önceki bölümden itibaren sondan başa doğru verilmiştir.]